LOUTAO 83 - SHEEYU BAIBEL (BSI)

Israel Maiye Ngaobayu Maitaoye Soukanghi Peio tea Veachi Paoyu

¹ Oh Ramai, pai khai timoa bupeiso; nasei teanou zei tea bupeiso!

² Zhukhaio, neye ngaoba-a buyu maitao sü shurao soua bure, ae neye ngaorayu maitao sü neye khaitya bure.

³ Puletao hai nevei maitaoye soushi peire donou shodo ashi sü kheikheisou soua bure; nenou khopeia buyu maitaoye sü puletao nou do ashi soua nou soushi peilai tea bure.

⁴ Puletao nou paoe, “Khe, puletao vei tyahrü veishi nou souha peilai she, sübüa Israel maiye panou teisa nou ngaibailai khe!”

⁵ Puletao nou tsüle ali souloua me zholoure; puletao nou ne pei hi hrailai donou vo souloure:

⁶ Edom ae Ishmael maitao; Moab ae Hagrits maitao;

⁷ Gebel, Ammon ae Amalek maitao; alia Philistin ae Tair maitao;

⁸ Assaria maitao-a puletaoye louzho loure, sübüa Lot vei tyaosholea Ammoa ae Moab maiye koa khouchi shoyu reihmai me ali souloure.

⁹ Nenou Midian mai hi, alia Sisera ae Jabia maitaoye Kishon Rei hinou soupeiyu büa puletao hia soupeio.

¹⁰ Puhnou puletaoye sü Endor hinou souha peie, ae puletao vei thaiphao sü panou deiphi hinou tangia khaipeie.

¹¹ Puletao vei süthai-apei maitaoye sü nenou Oreb ae Zeeb hi soupeiyu büa soupeio, puletaoye khasa-a hrüyu mai hrülaiye sü nenou Zebah ae Zalmunna hi soupeiyu büa soupeio,

¹² puletao nou haibüa paoe, “Ramai vei teidei nasü Eletao vei souloure donou polou laikhe.”

¹³ Oh Ramai, puletaoye sü teikhai nou hüpoa tayu naihü büpeio, ae teikhai nou hüpoa tayu thouba büpeio.

¹⁴ Hiphao hai mei nou deiyu büa, deichi phao hai mei nou deilaiyu büa

¹⁵ puletaoye sü nevei teikhai teirü ashi sünou hulai peio, ae nevei teikhai shishoyu sünou soupi tsütsü khaipeio.

¹⁶ Oh Mapaowo, puletao pah sü panou hraongu nou hopfüa bupeio, sükulouzü puletao nou nevei khouko nasü süloulai.

¹⁷ Puletaoye sü panou hraongu ngaoyu soupeio ae teisa panou ngaopia bulo; puletaoye panou chaa ngaoa thaita-o.

¹⁸ Ne likhei Mapao nasü baie, teideiphao teitei pei hinou kukulaio nasü baie touyu hai puletao panou sülo.