LOUTAO 80 - SHEEYU BAIBEL (BSI)

Tyahrü Naye Podakhai Peire donou Veachi Paoyu

¹ Oh Israel maivei Zhaokhopu, Etao vei pai kei peio; zhaotu me ali büa Etaoye süthai peipu, Etao chi nou peio. Shouh pfüyu cherabim khaona phaova nou vebuh soua buyupu,

² Tave Ephraim, Benjamin ae Manasseh maitao hi ne zhu ngaopeio. Nevei khouko nasü tave Etao hi ngaopeio; taveloua nou Etaoye khailupa peio!

³ Oh Ramai, Etaoye poa dakhai ve peio! Nevei zhuvea nasü Etaoye tave ngaopeio, sükulouzü Etao hai khailu loulai.

⁴ Khoukhoulai Ramai Mapao, teile kasho-a nevei maitao nou veachi paoyu sü nenou raroua bulaige?

⁵ Nenou Etaoye sü veahoyu hai touso touyu büa panou toua bure, ae dzü keyu büa panou nghidzü nou ke-a bure.

⁶ Nenou Etao vei teidei hisü panou kinapa soua buyu tyahrütao nou reih huloure, ae Etaoye ngaobayu maitaoye sü panou paoshi-a bure.

⁷ Oh Ramai, Etaoye sa-a dakhai ve peio! Nevei zhuvea nasü Etao hi tave ngaopeio, sükulouzü Etao hai khailu louyu sü ngaolou süe.

⁸ Nenou darkhabe ali Ejipt hinou pove peie; nenou tyahrü kukheye sü hulaiwua sünasü puletao vei teidei hinou shopeie.

⁹ Nenou sünasü panou veipa loure donou phi soupeie, sünasü dei khevai thoushoa nou maa tsülouloua dei veishi sü kei phouloure.

¹⁰ Deichi khesü sünanou tsüpa phouloure; sedar süübe khesü süna botao nou keiho loure.

¹¹ Süna vei süübotao nou kei poa Mediterranean Zai hi koute koure, ae Euphratis rei hi koute-a vere.

¹² Daidonou ne sünavei bokha khesü hrapa peiwe? Chuo süphi hi talai veyu mai tarali nou darkha shithou sü haitoulou bailaire;

¹³ rekou buyu nü khenou deisasawure, ae rekhaona khenou sünasü toua nou bure.

¹⁴ Khoukhoulai Ramai, Etao hi dakhai ve peio! Raki vanou Etaoye zhu kou peio; tave nevei maitaoye khailupa peio.

¹⁵ Nenou shopeikhai touyu darkhabe nasü tave vupa peio; nenou veisho-a panou keipayu darkhabe nasü kiko peio.

¹⁶ Etaoye ngaobayu maitao nou sünasü viloua meidei peiwure; puletaoye sü nevei lekha rarou sünou zhuloua souha peio!

¹⁷ Nenou dopa louyu maitao, ae nenou soudusopa peikhai touyu tyahrü nasü vupeio.

¹⁸ Eletao nou ne hinou tutapu khailai more; Etaoye panou hria bulo, ae Etao nou neye teisa nou paosholai.

¹⁹ Khoukhoulai Ramai Mapao, Etaoye sa-a dakhai vepeio. Nevei zhuvea leshi nasü Etaoye ngaopeio, sükulouzü Etao hai khailu louyu sü ngaolou süe.