LOUTAO 79 - SHEEYU BAIBEL (BSI)

Tyahrüye Khailupa Loure donou Veachi Paoyu

¹ Oh Ramai, neye sümoyu tyahrü kukhe maitao nou nevei teidei hisü reih huloure. Puletao nou nevei sheeyu Rathoki nasü souzhai khaiwure ae Jerusalem sü soushi souka nghiwure.

² Puletao nou nevei maitao pfüphao sü panou tei hi raohouye pa toure donou khaipeie, nevei kilai maitao vei thaiphao hai panou rekhaonaye toure donou khaipeie.

³ Puletao nou nevei maitao zhe hai dzü büa soupa peie; zhe sü Jerusalem teitei hi dzü büa küre, ae puletaoye sü mai linoua daovu peire mai hare.

⁴ Etao hai kinapa maitao hinou hraongu sü ngaore, puletao nou Etaoye sü konüre ae ngaophou moa Etaoye sü pahnü soupeie.

⁵ Oh Mapaowo, ne Etaoye teisa nou raroua bailaiwu? Nevei lekha rarou nasü mei taoyu büa teisa nou tao-a bubai laidou?

⁶ Nevei lekha rarou nasü neye tho moyu tyahrütao hi vepeio, ne hi veachi pao moyu maitao hi vepeio.

⁷ Daiolouzü puletao nou nevei maitaoye sü southawure; puletao nou nevei teidei nasü soushi peiwure.

⁸ Etao vei paipaoh maitao nou mah soukhai touyu donou Etaoye tudee peiso. Etaoye chunou thashoa zhuvea peio; daiolouzü Etao hai areih sü hazei baire.

⁹ Etaoye soukha peio, Oh Ramai, Etaoye khailupa peio; neye tsükhou loure donou Etaoye vupa peio ae Etao vei mahmo khesü khaipeio.

¹⁰ “Neletao vei Ramai sü daikinou bue?” tea daisounou tyahrü kukhe maiye panou Etao hisü chi nouwe? Nevei kilai maitao zhe soukou peiyu donou nenou tyahrü sütaoye tudee peiyu nasü Etao hi soungao peikhaio.

¹¹ Hukhaki hinou buyu maitao nou lea buyu paisü keipeio, ae nevei khouko sünou, southa laire tea buyu maitaoye sü khailupa peio.

¹² Mapaowo, neye konüa buyu tyahrütaoye sü puletao nou soupfüyu deida anai koute hai nenou puletao hi soupeio.

¹³ Süthaisü nevei zhaokhome, nevei maitao, Etao nou neye teisa nou kalo paolai, ae vere teile veishi hinou neye paosholai.