LOUTAO 78 - SHEEYU BAIBEL (BSI)

Ramai ae Puhvei Maitao

¹ Avei maitaore, Enou doupeiyu khesü keilo, Enou paoyu achi sü leloua kei noulo.

² Enou veishoyu chipaotao ae daoh maivei ko tateiyu khesü paongao peilai,

³ Eletao nou süchoua buyu kotao, puopoah maitao nou paodaikhai touyu taosü Enou paopeilai.

⁴ Etao nou sütao hai Eletao vei nahmai hinou poku khailai moe; Etao nou vere bonakha hisü Mapao vei khouko ae puhnou khupayu vah haso soupeikhai touyu khesü paopeilai.

⁵ Puhnou chikha khesü Israel maitao hi peie, ae kharochi khesü Jakob vei tyaosholea hi peie. Puhnou Etao puopaoh maitao hi chikha khesü puletao vei nahmaitao hi paodai khaipeio tea kharochi peie,

⁶ sübüa vere bonakha hai panou puletao hinou douloua puletao vei nahmaitao hisü paodou peilai.

⁷ Haibüa nou souyu hai puletaoye panou Ramai ye lülouche loua puhnou soupeikhai touyu vah haso khesü panou ngaimore donoue, ae puhvei chikhatao hai zü loure donoue.

⁸ Puletaoye panou puletao vei puopaoh maitaoye raimore donoue; puletao vei puopaoh maitao hai khaitya-a paochi züba-e, Ramai hi puletao vei tsüle teitei nou pei moe, ae puh hinou chilee cheche-a bukoute moe.

⁹ Ephraim maitao hai reih souyu teithe zhou nou voulou ae voulouthou sü pfüloua tutare.

¹⁰ Puletao nou Ramai ye koa vo soukhai touyu nasü pfüthowure, ae puhvei chikha khesü züba-e.

¹¹ Puletao hai Ramai nou khupayu vah haso soupeikhai touyu khesü ngaiwure.

¹² Puletao vei puopaoh maitao nghoujü nou Ramai nou khupayu vah haso hai Ejipt maivei teidei Zoan deikho hinou soungao peie.

¹³ Puhnou zaidu nasü souko laipeia puletao panou tacho paloue; ae dzü sü kivo büa latsü tea panou chao-a khopeie.

¹⁴ Puhnou puletaoye sü heakou hai teihao panou khosa-a tapeie, ae khei ki hai mei ava nou süthaisa-a tapeie.

¹⁵ Radeiki hi tayu phaki, puhnou chuh hinou dzü hai dapa peie, ae puletaoye panou dzü hai zai hinou keyu büa ke loue.

¹⁶ Puhnou chuhdu vanou dzü hai reitou büa panou küpa peie, ae rei büa panou dzü sü kü peie.

¹⁷ Ana puletao hai radeiki hinou Kukulai hi Abuo Ramai pei hi khaitya mahmo khesü soua baie.

¹⁸ Puletao nou tounüyu touso khesü kho-a puletao nou Ramai ye sü la-a zhai zhue.

¹⁹ Puletao nou Ramai ye ngaophou moa haibüa paoe, “Ramai nou radeiki hai hinou touso khesü peilou süvu?

²⁰ Puhnou chuh sü dapeia panou dzü sü reidzü küyu büa küpa peie; ana puhnou raokhao ae sou hai puhvei maitao hi peilou süvu?”

²¹ Südonou süsü Mapao nou choulou khai-e, puh hai rarou sholure; puhnou puhvei maitao hisü mei seikou thoupeie, ae puletao hisü raroupu loure,

²² daiolouzü puletao nou Ramai ye sü lü moe, ae puletaoye khailupa peilou süe touyu nasü louche pei more.

²³ Ana puhnou rateiye sü kharochi peia panou raki kikhu sü houpeie;

²⁴ ae puhnou puletaoye panou toure donou manna sü seikou peie, ae rakiva thou sü puletao hi peie.

²⁵ Südonou puletao hai rakivamai vei touso sü tou-e, ae puletaoye panou tounüyu veishi sü puhnou peie.

²⁶ Puhnou teinghi palova teikhai sü panou hüve, ae puhvei khouko sünou khelova buyu teikhai sü panou hü shisho vepeie;

²⁷ ae puhnou puhvei maitao hi raohou khesü reipe hi buyu vonai zhoua hüve peie.

²⁸ Raohoutao hai puletao vei fühao toutsü hi ae puletao vei sahpao pehao teitei hi dekou peie.

²⁹ Südonou maikhe mai hai sütao sü touloua rukhare; puletao nou jüpayu veishi sü Ramai nou puletao hi peie.

³⁰ Ana puletao nou thainüa touyu touso nasü touche loumoa bukinou,

³¹ puletao pei hisü Ramai vei lekha rarou nasü vere, ae puletao hrohinou khoukayu maitao ae nahle maitao hrohinou pfüphao veikayu maitaoye sü southawure.

³² Haibüa vepa-a buyuma maikhe mai hai mahmo khesü soukoute-a bubaie; puhnou khupayu vah haso tyatyali soupeia buyuma puletao hai puhye louche peimore.

³³ Südonou puhnou puletao vei teithe teile sü ssü haiyu büa souhawure, ae puletao vei hrümamai hai thashoa panou pishiyu hinou akhai soupeie.

³⁴ Puhnou kamaia southa peiyu phaki, mai kukhe maitao hai puh hi dakhai ve-e; puletao nou ledaloua puh hi soutaosoua veachi sü paoe.

³⁵ Ramai hai puletaoye vupa-apeio nasü touyu hai puletao nou licho veloue, ae Khoukhoulai nanou tave puletaoye soukha peie touyu puletao nou süloue.

³⁶ Ana puletao nou müvei müthea nou puh hisü dayu chi nou pao-a baire.

³⁷ Puletao vei tsüle hai puh hinou lachü tea bumoe; puletao nou koa puhye vo soukhai touyu nasü puletao nou chilee cheche-a thaifü peimoe.

³⁸ Ana Ramai nou puhvei maitaoye sü zhuvea peie, puhnou puletao vei mahmo khesü khaipeie ae puletaoye sü souha pei moe. Vu taoli hai puhvei lekha rarou nasü khailoua panou pamoe.

³⁹ Puhnou puletao hai thai-a bailaiyu mai ali baie, teikhai nou hüta-a dakhai vemoyu büa baie touyu sü licho loua baiwe.

⁴⁰ Vu kizhou koute puletao nou puhye rekounou khaitya peie; vu daizhou koute hai puletao nou puhye radeiki hinou le souvea peie!

⁴¹ Puletao nou Ramai ye daibü laisa tea zhuyu thainou zhupu khaikhai peie, ae Israel maivei Sheeyu Ramai ye sü souvea shopeie.

⁴² Puletao nou puhvei khouko ae puletaoye ngaobayu maitao bah hinou khailupa peiyu teithe nasü licholou more.

⁴³ Puletao nou puhvei vah haso soupfüpei khaitouyutao ae Ejipt maivei Zoan deikho hinou khupayu vah soupeiyu khesü ngaiwure.

⁴⁴ Puhnou reidzü khesü zhe hi souda thou peie, ae Ejipt maiye panou kere dzü sü souha peie.

⁴⁵ Puhnou puletaoye souvea peire donou puletao hisü khaomai seive peie, ae vaoye panou puletaoye soushi peie.

⁴⁶ Puhnou khazü seive puletao vei shinamara khesü touloue, ae puletao vei dou sü soushi khaipeie.

⁴⁷ Puhnou puletao vei darkhabe khesü panou reithou nou kou souha peie, ae doushibe khesü panou vüra nou soushi peie.

⁴⁸ Puhnou puletao vei kikhaorü khesü reithou panou kou deitha peie, ae zhaotu nghitu me khesü teipeiyu sünou southa peie.

⁴⁹ Puhnou puletao hi puhvei rarou lekha ae chaa sü seikou souvea peie, ae soushi soukanghire donou rakivamai me aliye seive peie.

⁵⁰ Puhnou puhvei lekha nasü nuchao khaimoe, moyuma puletao vei hrümai sü vupapei moe, ana puletaoye southare donou rahta rahvu nasü seive peie.

⁵¹ Puhnou Ejipt hi nah narai nahpoutu mai hrülaiye sü southa khaipeie.

⁵² Süthaisü puhnou puhvei maitaoye sü zhaotu büa süthaisa-a papeie, ae radeiki hinou zhaokhome ali büa puletaoye süthaisa-a tapeie.

⁵³ Puhnou puletaoye panou kaozhou ashi daomoa süthaisa-a tapeie, ae puletao hai ngaopi moe; ana puletaoye ngaobayu maitao hai zaidzü nou maokhai touloure.

⁵⁴ Puh lah veilouyu deichitao, puhvei sheeyu teidei hisü puhnou puletaoye save thoupeie.

⁵⁵ Teidei sühinou hrüa buyu tyahrü kukhe maitaoye sü puhnou puhvei maitao talouyu phaki hulai peie, puhnou puletao vei teidei sü Israel maitaoye zha dadezhi peie, ae puletao vei ki khesü puletaoye panou hrüre donou peie.

⁵⁶ Ana puletao nou Khoukhoulai Ramai ye sü khaitya pare ae puhye daibü laisa tea zhutare. Puletao nou puhvei chikha khesü züpei more,

⁵⁷ ana puletao hai puletao vei puopoah maitao büa khaitya pare, ae chilee cheche more, puletao hai khirukaoyu vouloushu ali büa baire.

⁵⁸ Puletao nou rashitaoye thoyu buh souyu donou puhvei rarou sü soupa peie, ae basharataoye thoyu donou puhvei lekha sü daipa peie.

⁵⁹ Sütao hai puhnou ngaolou khaie Ramai hai lekha pare, südonou puhnou puhvei maitaoye sü malaiwure.

⁶⁰ Puhnou Etaoye koa sabuyu sahpao, puh buh Shiloh nasü thaowua tare.

⁶¹ Puhvei khouko ae kathe nasü Etao hi bue tea shee soua buyu Vo Sübvü nasü panou ngaoba maiye shaopoa tare.

⁶² Puhnou puhvei maitaoye rarouyu donou puletaoye sü ngaoba maitao panou southawure.

⁶³ Nahleyu maitao hai soureih hinou southawure, südonou nahleyu naotu maitaoye mai linoua na peire mai hare.

⁶⁴ Napao maitao hai kho-nghou hinou thaire, ae puletao vei mimea maipfütaoye panou kra-a dopfü baide.

⁶⁵ Süthaisü khouchi shoyu mai ali nou zhaoh soloua shura souyu büa Mapao nou tashu loure.

⁶⁶ Puhnou puhye ngaoba-a buyu maitaoye sü teisa panou hraongu ngao-a bure buh hisü hukou thoupeiwure.

⁶⁷ Ana puhnou Josef vei tyaosholea maitaoye sü malaire, puhnou Ephraim khü-a dolou more.

⁶⁸ Anou puhnou Judah khü sü dopaloure, ae puhnou jüpa shoyu Zion Deichi nasü doloure.

⁶⁹ Puhnou buh sühinou rakiva puhvei ki buyu na büa puhvei Rathoki sü souloure; Puhnou teisa panou khouchia buloure donou deiphao soupeiyu büa sünasü soushupa peiwure.

⁷⁰ Puhnou zhaotu kho-a buyu puhvei kilai David ye sü dopaloure,

⁷¹ zhaotu kho-a buyu hinou puhnou puhye saloua panou Ramai vei maitaoye khore donou Israel maivei veo sü soupeie.

⁷² David nou le sheesha tea nou puletaoye sü kiko peie, ae dokai veishoyu sünou puhnou puletaoye süthai peie.