LOUTAO 77 - SHEEYU BAIBEL (BSI)

Veahoyu Phaki Sousava Peiyu

¹ Enou shusoua nou Ramai hi kra-e; Enou shusoua kra-a nou khoe, ae puhnou avei veachi nasü kei peie.

² Veahoa buyu phaki Enou Mapao hi veachi paoe; Enou khei mathe abah lapoa nou veachi paoe, ana Enou savayu sü ngaolou moe.

³ Enou Ramai ye tsüchoyu phaki, ale sü veare; Enou soutaosoua puhye lichoyu phaki, Esü chathaire.

⁴ Puhnou Eye kheimathe panou zai heapoa nou bue, E levea buyu donou rao-a raolou hore.

⁵ Enou raichoki teithe teile khesü tsücho vere, ae latayu po teile taosü licho vere.

⁶ Enou kheimathe tsüchopoa nou bue; Enou lichoa buyu phaki, haibüa nou lah ahi sü Enou noue:

⁷ “Mapao nou Etaoye teisa nou thaokhaia bailaiho? Puhnou Etaoye leshi peipu khailai modeho?

⁸ Puhnou Etaoye zhuvea leshiyu nasü bairevu? Puhnou apaokhai touyu nasü vete morevu?

⁹ Ramai hai puhvei zhuvea leshi nasü ngai deho? Puhvei zhuvea leshiyu thaosü lekha rarou nanou bubaireho daisouge?”

¹⁰ Süthaisü Enou haibüa paoe, “Avei tsüle daikayu nasü hainare— süolouzü Ramai hai khouko hatare.”

¹¹ Mapaowo, Enou nevei vah haso adu khesü licho peilai; Enou raichoki nenou souyu nevei khupa vah khesü licholai.

¹² Enou raichoki nenou soupfüyu vah haso teitei sü tsücholai, nevei khupayu vah haso khesü Enou lichopoa nou bulai.

¹³ Oh Ramai, nenou soupfüyu teitei sü shee-a baie. Rah kukhe ali-a ne büa dusho moe.

¹⁴ Ne hai khupayu vah souyu Ramai nasüe, nevei khouchi nasü nenou tyahrütao hi soungao peie.

¹⁵ Nevei maitaoye sü nevei khouko sünou khailupa peie, Jakob ae Josef vei tyaosholea maitao sü nenou khailupa peie.

¹⁶ Dzütao nou neye ngaolouyu phaki, Oh Ramai, puletao nou neye ngaopire, ae zaidu hi buyu dzü khesü ngure.

¹⁷ Teihao sünou teirü kou peie; ratei hinou tei sü süre, ae tei peivavayu sü buliki peivava vere.

¹⁸ Nevei teisüyu kho nasü nou büvere, ae teideiphao teitei sü teipei vavayu nasünou vapha touloure, deiphao sü nguhrührüa lülu lure.

¹⁹ Nenou dzü khüpayu phao hinou tawe, nenou zaidu nasü tachopa peie, ana nevei phihea sü ngaomoe.

²⁰ Nenou nevei maitaoye sü zhaokhome ali büa panou Moses ae Aaron ye süthaisa-a tapeie.