LOUTAO 76 - SHEEYU BAIBEL (BSI)

Veilouyu Ramai

¹ Ramai ye sü Judah hinou süwe; puhvei zhih sü Israel mainou tsükhouwe.

² Puhvei ki hai Jerusalem hinou bue; puhnou Zion Deichi hinou hrüe.

³ Puhnou buh sühi sünou ngaoba maitao vei voulouthou, puletao vei rü, khoche ae reih souyu baseina khesü soushi souha peie.

⁴ Oh Ramai, ne hai daizhou koute duso sarou! Nenou ngaobayu maitao jünou veiloua deichi vanou dakhai veyu phaki nevei khouko ava nasü daizhou koute ngaoveie!

⁵ Puletao vei khuveih shoa buyu reihmaitao hai chuo puletao vei buyu na teitei nou laolai khaiwua thaiyu mainou zü-zhiyu kua züa bure; ae puletao vei bah sü lashupu louhore.

⁶ Oh Jakob vei Ramai, nenou puletaoye soupi peiyu phaki, puletao vei rheitao ae rheipfüa laiyu maitao sü dekou deithare.

⁷ Ana Mapaowo, neye sü mai hrülai nou ngaopi-e. Nenou rapayu phaki, mai linoua nevei nghoujü hinou la-a bulou hoe.

⁸ Nenou nevei chidei nasü raki vanou paosü peie; deiphao mainou ngaopia nou zei tea bure,

⁹ nenou tashu lalou-a deiphao hinou veaho-a buyu maitaoye khailupa peilai tea nenou chidei peiyu nasü sükuyu phaki.

¹⁰ Mai vei lekha rarou nasü neye paoshopu peia bailai, soureih souyu hinou thaimoa shokhai toua buyu maitao nou nevei khonüh khesü nülai.

¹¹ Nenou peilai tea apaokhai touyu nasü nevei Ramai Mapao hi peilo; nghia buyu tyahrü hrülai, neletao vei sapeina khesü puh hi pove peio. Ramai nou deiphao maiye panou puhye piyu sü soupeie;

¹² Puhnou khaophu soua buyu veo nahpoutu maitaoye sü ponakou peie ae dushoyu veo maitaoye sü soupi peie.