LOUTAO 75 - SHEEYU BAIBEL (BSI)

Chiku-apeio Ramai

¹ Etao nou ne kalo paowe, Oh Ramai, Etao nou neye kalo paowe! Etao nou nevei aduso nasü shapaowe, ae nenou khupayu vah haso soukhai touyu khesü Etao nou paowe.

² Ramai nou paoe, “Enou chikure teile sü dadewure, ae kaozü hinou Enou chi sü kupeilai.

³ Hrikhaona veishi nou ngaopi-a buyuma, ae teideiphao hai lüa buyuma, Enou süna soushukhai touyu beikhei nasü soutsü shoa khaipei khaitoue.

⁴ Enou mai ashi maitao hisü rochipu khaiso tea paopeie,

⁵ ae puletao hisü khaophu soupu khaiso tea paopeiwure.”

⁶ Soudusho peiyu nasü teinghi palova moa teinghi loulova nou, moyuma reilova nou, moyuma khelo vanou ve moe;

⁷ ana Ramai nou chilou sü kupeia baie, puhnou kamai-a ponakou peie, ae kamai-a polashu peie.

⁸ Mapao nou puhvei lekha rarou nou phoupoa buyu darkha zhaoh pai ali hai puh bah hinou poa bue. Puhnou sünasü lakou peie, ae mai ashi mai hrülai nou ke loure; puletao nou paitei akhai hi koute hai ke khailoure.

⁹ Ana Enou teisa nou asah soupoa nou Jakob vei Ramai ye sü lou sousholai.

¹⁰ Puhnou mai ashi maivei khouko khesü souha laiwulai, ana mai aveih maivei khouko sü pulailai khelai.