LOUTAO 73 - SHEEYU BAIBEL (BSI)

LARÜBVÜ ASÜNA ( Lou 73—89 ) Ramai vei Kaozü

¹ Cheche vuzünou Ramai hai Israel mai hi ae tsüle sheesha-a buyu maitao hi veisho-e.

² Ana Enou puhye loucheyu sü hata nore; avei lü sü khaita nore,

³ daiolouzü Enou khaophu souyu maitaoye ngaoraiyu donou, ae mai shiyu maitao nou ha veishi hai kaozhou veia soulou-a nou savayu khesü ngaoloukhaie.

⁴ Puletao hai sounou soumoe; puletao hai khouchi shoa nou pfüphao veishoa bua baiwe.

⁵ Puletao hai mai kukhe maitao büa veahoyu sü ha-e. Puletao hai mai kukhe büa veahoyu sü daomoe.

⁶ Südonou puletao hai khaophu souyu nasü touh toupfüyu büa lai-a baiwe, ae züveilai touyu sünou sabanü banouyu büa laiwe.

⁷ Puletao vei lüthou hinou hashi sü lapa peiwe; ae puletao vei tsüle hisü vah ashi soure donou tsücho koute-a bubaiwe.

⁸ Puletao nou mai kukhe maiye konüpeia chila ashi sünou paopeie; puletao hai khaophu soupoa maiye souvea peilai tea bua baiwe.

⁹ Puletao nou raki hinou buyu Ramai ye sü paoshi peie, ae deiphao maiye chaochao soua kharochi peiwe.

¹⁰ Südonou Ramai vei maitao koute-a puletao thaisü fütare, ae puletao nou chi paoyu khesü louche tare.

¹¹ Puletao nou paoe, “Ramai nou halia süloulai moe; Kukulai hi Abuo nanou haliro phoupa louhoe.”

¹² Mai ashitao nou sübüa bue. Puletao hisü halih halanou chekho tea bubaie, ae puletao hai toungi sho-a buyu pei hinou ngipu khaikhai-a bue.

¹³ Enou ale shisha-a teanou buyu ae mahmo ali-a soulai moe tea buyu hai hamako baiyu phare.

¹⁴ Oh Ramai, nenou Eye sü tobai soumoa veahoyu sü peie; nenou Eye sü teithe tsü nou tudee peie.

¹⁵ Enou haibüa chi paoyu thaio, nevei mai ali nou chi paozüyu nasü pao more.

¹⁶ Enou tatei shoa buyu haina vanou tsücholai tea te-e, ana Eye donou hainasü tatei sholoure,

¹⁷ nevei Rathoki hi velou loumo koute hai Eye donou tateire. Süthaisü Enou puletao hi dai-e vepalai touyu khesü süloue.

¹⁸ Nenou puletaoye sü dei jülealeayu buh hisü khai peie, ae puletao hai hakatayu hisü delouta-a bailai!

¹⁹ Puletaoye sü thashoa nou soushipei bailai, puletao hai pishi-a nou hakayu hisü louta bailai.

²⁰ Puletao hai zhimekou büa shona kushu ngaiwu bailai; Oh Mapaowo, nenou tashu lapeiyu phaki, puletao hai ngaomota-a bailai.

²¹ E lekha sho-a buyu phaki, ae ale daikhai toua pepoa buyu phaki,

²² E hai soukhaona ali büa tsüvei moe; Enou neye sü sükulou moe.

²³ Ana Enou ne nghiki bukoute-a baie, ae ne bah nou Eye sü süthai peie.

²⁴ Nevei paodou peiyu khenou Eye sü khosa-a laipeie, ae akhai hisü nenou Eye tsükhouyu hinou saloulai.

²⁵ Raki vasü neye baimoa avei nakukhe sü dai bue? Neye bai moa Enou deiphao hisü jüpayu kukhe halia hae.

²⁶ Avei tsüle ae pfüphao sü lülouho ta-a bailai, ana Ramai hai avei pfüchi nasüe; Enou puhye likhei jüpa-a baie.

²⁷ Neye thao-a tayu maitao sü cheche vuzünou hakata-a bailai; chilee cheche moyu maiye sü nenou souhawu bailai.

²⁸ Ana Enou Ramai ye nghia buyu hai Eye donou daizhou koute veisarou; Enou Khoukhoulai Ramai Mapao ye sü avei baibu souloure. Ae puhnou soupfü khaitouyu vah haso teitei sü Enou shapaolai!