LOUTAO 72 - SHEEYU BAIBEL (BSI)

Veo Mainou Veachi Paoyu

¹ Oh Ramai, veo sü nevei checheyu na hai doupeio, nevei kaozü nasü puh hi paongao peio,

² sükoulouzü puhnou nevei maitaoye sü kaozü hinou khasa-a hrüloulai, ae veahoyu maitaoye sü acheche hinou sa-a hrüloulai.

³ Teidei hisü panou sava-a hrülouyu sü soupeio, ae kaozü hinou maikhe maiye panou hrüyu sü ngaolo.

⁴ Veoye panou toure hayu maitao hia acheche hinou chilou sü kupeio, puhye panou touhayu maitaoye soukha peio, ae puletaoye souvea souhoyu maitaoye sü hraongu soupeio.

⁵ Khouh teinghi hamo koute nevei maitaoye panou neye tho-a bulo.

⁶ Veo hisü pou daitao hi teirükou shopeiyu büpeio, ne dei hi teirükou peiyu büpeio.

⁷ Puhvei hrümai sasü checheyu naye panou phoulea-a bulo, ae sava-a kaonayu nasü panou khouh va-a nou bubusa sü bupeio!

⁸ Puhvei vedei sü panou zai ali hinou poa zai ali hi koute peio, ae Euphratis rei hinou poa teidei akhai hi koute souduso papeio.

⁹ Radeiki hinou hrüyu maitao nou tave puh nghoujü hinou khurülai, ae puhye ngaobayu maitao hai deiphi kaokou züloua nai laitoulai.

¹⁰ Spain hi veo ae zaipeidei hinou hrüyu maitao nou puh hi sapeina khesü pove peilai; Arabia ae Ethiopea hi vemaitao nou puh hi sheela khesü pove peilai.

¹¹ Veo mai hrülai nou puhye khurülai, tyahrü veishi nou puhvei kuvah sü soulai.

¹² Touha sohayu maitao ae veahoa laiyu maitao nou puh hi tave soukha khoyu phaki, puhnou puletaoye vupa peiwe.

¹³ Puhnou lülouho mai ae touha-a laiyu maiye sü zhuvea peie, ae veahoa laiyu maiye sü puhnou vupa peie.

¹⁴ Puhnou maiye souveayu mai ae zhaipou ashi maitao bah hinou puletaoye sü vupa peie; puletao vei hrümai hai puhye donou muh teisho-e.

¹⁵ Veo sü panou hrüsho hrülo! Sheba hi buyu sana sü puh hi pove peio; teisa nou puhye donou pa buliki nou veachi sü paopeio. Ramai vei shiha sü tobai soumoa panou puh hisü buyu soulou theo!

¹⁶ Teidei hisü panou thoudzü veishoa papeio; deichiva sü pa shinamara nou phoutao bupeio, rashi khesü panou Lebanon hi büa shivei shopeio. Nuhdutao hisü panou dou hi pou nou hrüphou louyu büa maikhe maiye panou hrülo.

¹⁷ Veo vei zhih sü panou teisa ngaikhai peiso, puhvei kathe sü teinghi loumo koute panou bulo. Ramai nou veo hi hapei khaitouyu büa tyahrü veishia sübüa shiha peio tea panou Ramai hinou kholo.

¹⁸ Israel maivei Ramai Mapao ye sü paosholo! Puh likhei haibüa khupayu vah haso khesü soua baie.

¹⁹ Puhvei zhih aveih nasü teisa nou paosholo! Puhvei khouko ava nasü teideiphao veishi hi panou phoutao-a bulo! Amen! Amen!

²⁰ Jesse nahpoutu David vei veachi sü hainou akhai soure.