LOUTAO 71 - SHEEYU BAIBEL (BSI)

Tsümai nou Veachi Paoyu

¹ Oh Mapaowo, Eye panou vupa peire donou ne hi vewe; Eye panou hraongu daoso!

² Nevei acheche hinou Eye soukha peio ae vupa peio. Nevei noubei sü ahi pfürei peio ae Eye khailupa peio.

³ Nenou avei chudu nasü soupeia Eye panou ne hinou bailo, ae nenou khoushoyu kaopo nasü soupeia Eye khailupa peio, daiolouzü ne hai avei chuhdu ae kaopo nasüe.

⁴ Oh avei Ramai, Eye mai ashi maitao hinou, cheche moyu ae leshi hayu maitao bah hinou vupa peio.

⁵ Khoukhoulai Mapaowo, avei areih nasü ne baie. E nahle-a bukinou neye sü louchewe.

⁶ Avei hrümamai teitei nou neye likhei louche-a bubaie. E nalouyu teithe hinou zhou koute hai nenou Eye kiko poa salai peie. Enou neye sü teisa nou paosholai.

⁷ Avei hümamai hai mainou doulu veiyu ali soua bue. Daiolouzü nenou Eye kho-apeio nasü soupeie.

⁸ Enou teisa nou neye paosholai, ae nevei kathe khesü shapao peilai.

⁹ Tsülou tayu thainou Eye malai peiso, khouko hatayu thainou Eye thaolai peiso.

¹⁰ Ngaobayu maitao nou Eye sü southanüa bure; Eye soushi peilai tea puletao nou do ashi sü soua daloure.

¹¹ Puletao nou haibüa paoe, “Ramai nou puhye sü thaowure; Eletao nou puhye thaihukou nülou laikhe; puhye vupa peire mailia hare.”

¹² Ahinou dousho-a nou bupeiso, Oh Ramai; avei Ramai, Eye thashoa nou tave soukha peio!

¹³ Eye dua buyu maitaoye sü panou hraongu ngao-o ae souha peio. Eye soushilai tea te-a buyu maitaoye sü panou veahoyu ae chaa ngaoyu soupeio.

¹⁴ Enou tobai soumoa ne vureih-a bulai; Enou neye sü paoshokhai poshokhai-a bulai.

¹⁵ Enou nevei aveih khesü paolai; Enou süve ngaovete louhoa buyuma nevei khailupa peiyu nasü thaokhai toumoe paongao peilai.

¹⁶ Khoukhoulai Mapaowo, Enou nevei khouko nasü paosholai, Enou nevei aveih nasü shapaolai.

¹⁷ Oh Ramai, E nahle-a bukinou nenou Eye sü paodou peie, ae chu koute-a Enou nevei khupayu vah haso khesü pao-a laiwe.

¹⁸ Chuo Esü tsüloure ae apei paopare, Eye thaolai peiso, Oh Ramai! Enou nevei khouko ae aduso nasü vere khaphao veishi hi shapao peia buyu phaki Eye koa salai peio.

¹⁹ Oh Ramai, nevei khouko ae acheche nasü ratei hi khetere. Nenou vah haso adu khesü soupeie; neye raiyu mai aliro ha-e.

²⁰ Nenou apei hi veahoyu ae sounou khesü seive peie, ana nenou Eye khouchi peidakhai peie; nenou Eye khü hi loutare hinou popa peie.

²¹ Nenou Eye raichoki jünou soudusopu peilai; nenou Eye sousa souvapu peilai.

²² Enou neye sü gaigou noupu koa paosholai, Enou nevei chilee checheyu nasü paosholai, Oh avei Ramai. Enou gaigou daloua ne hi lou soulai, Oh Israel maivei Sheeyu Ramai.

²³ Enou asah soupoa nou ne hi lou soulai, avei hümamai veishi nou peia nou neye lou sousholai daiolouzü nenou Eye khailupa peie.

²⁴ Enou nevei acheche nasü teisa nou paolai, daiolouzü Eye soushilai tea laiyu maitaoye sü nenou hraongu soupeie ae soukanghi khaipeie.