LOUTAO 66 - SHEEYU BAIBEL (BSI)

Paoshoyu ae Kalo Paoyu Lou

¹ Deiphao mai hrülai, Ramai ye shusou asa-a paosholo!

² Puhvei zhih aveih nasü lou nou soushokhaio; puhvei kathe khesü paosho peio.

³ Ramai hi haibüa paokhaio, “Nenou soupfüyu vah haso khesü daizhou koute khupa-e! Nevei khouko hai duleyu donou neye ngaobayu maitao koute-a pi-hi poa nou neye khurüwe.

⁴ Deiphao mai hrülai nou neye thowe; puletao nou neye sü lou soushowe, puletao nou nevei zhih sü lou nou soushowe.”

⁵ Ramai nou soupeikhai touyu vahtao, ae deiphao mai hi khupayu vah haso soupfü peikhai touyu khesü tave zhukhaio.

⁶ Puhnou zaidu nasü dei theyu hi soudapa peie, Etao puopaoh maitaoye panou reidu sü phi nou kacho paloue. Puhnou soupeikhai touyu vah haso donou Etao nou lesa-e.

⁷ Puhnou teisa nou puhvei khouko sünou khasa-a hrüe, ae puhnou tyahrütaoye sü zhupoa nou bue. Khaitya-a puhye duyu maiye panou veilouyu sü soupeiso.

⁸ Deiphao mai hrülai, Etao Ramai ye paosholo; neletao nou puhye paoshoyu pai sü panou choukhaio.

⁹ Puh nou Etaoye sü panou hria nou bupeie, ae Etaoye panou kaoduta moe.

¹⁰ Oh Ramai, nenou Etaoye shahu hai pothou mei deia zhuyu büa zhupeie.

¹¹ Nenou Etaoye panou sho-rü hisü deloue, ae Etaoye panou koupo sühsho-a pfüe.

¹² Ngaobayu maitaoye panou Etaoye taidei peie; Etaoye panou mei alia dzü hinou ta-e, ana nenou chuo Etaoye sü kaonayu buh hi save khaipeie.

¹³ Enou meidei-a posheela peiyu khesü nevei ki hi pove peilai; Enou apaokhai touyu thaifüa neye posheela peilai.

¹⁴ Enou veahoa buyu phaki, ne hi soupeilai tea amü nou paokhai touyu khesü souvete peilai.

¹⁵ Posheelabu hinou meidei-a posheelare donou Enou zhaotu khesü pove peilai, Enou chode ae nghitu khesü pove sheela peilai, sübüa meideia posheelayu meikhao nasü panou rakiva khaokhelai.

¹⁶ Ramai ye khuhao-a buyu mai hrülai, taveloua nou kei khaio, Ramai nou ahi dai-e soupei khaitoue touyu khesü Enou neletao hi paongao peilai.

¹⁷ Enou kra-a puh hinou soukha peio tea kho-e; Enou puhye sü lou sousho-e.

¹⁸ Hakinou Enou avei mahmo khesü poku khaitoua bure toulouzü, Enou khoyu khesü Mapao nou keinou peilai moe.

¹⁹ Ana Enou veachi paoyu khesü Ramai nou kei noupeie.

²⁰ Enou Ramai ye sü paoshowe, daiolouzü puhnou avei veachi sü keipei bamoe, moyuma puhvei tobai soumoa leshi zhuvea peiyu nasü ahinou povai pota peimoe.