LOUTAO 64 - SHEEYU BAIBEL (BSI)

Vupa Peire donou Veachi Paoyu

¹ Oh Ramai, Esü veahoshoa nou bure, avei veachi sü kei peio! Ewo ngaobayu maitaoye pi sho-a nou bure, avei hrümai sü khailupa peio!

² Mai ashi maivei shodo ashi hisünou ae puletao vei zhaipou shiyu hinou Eye vupa peio.

³ Puletao hai puletao vei mali sü khoche mü thaiyu büa thaiwe, ae chipao lako ashi sünou voulouthou büa maiye kavuwe.

⁴ Puletao hai hraoyu hazei tea nou dayu chi khesü thasho-a nou paola poa ta-a baiwe; puletao nou mai aveih maiye sü thailo nou dahühüloua soushi pei baiwe.

⁵ Puletao hai vah ashi soure donou mai ali nou aliye sü süpeiwe; puletao hai kheikhei soua sho-rü southoure donou chi phawe, ae “Mai linoua süsü ngaolou hoe,” tea puletao nou tsüchowe.

⁶ Puletao nou shodo ashi soure donou tsüchoda lou nou paoe, “Etao nou shodo ashi soure nasü soutaosoua tsücho daloua nou soukhaiwure.” Mai vei tsüle hai mai linoua süve ngaove telou hoe.

⁷ Ana Ramai nou puletaoye sü voulouthou sünou kavu peilai, ae sükhai moa puletao hai zhiloua bailai.

⁸ Puletao vei chipao vanou Ramai nou puletaoye souha bailai, puletaoye ngaolouyu mai hrülai nou puletao vei pei sü ngulai.

⁹ Süthaisü mai hrülai nou ngaopilai; Ramai nou soupfüyu vah hasotao sü puletao nou tsücholai, ae puhvei vah khesü puletao nou paotalai.

¹⁰ Mapao nou soupeikhai touyu vahtao donou acheche mai hrülai nou asalai. Puh hinou puletao hai tave bailoulai; ae mai veih mai hrülai nou puhye paosholai.