LOUTAO 63 - SHEEYU BAIBEL (BSI)

Ramai ye Thainüa Buyu

¹ Oh Ramai, ne hai avei Ramaie, Enou neye thainüa bue. Avei pfüphao teitei nou neye sü jüpa sho bue; dzü lia ha-a nou thekei tea peko vaivai-a buyu dei ali büa avei rako sünou neye reihsho-a nou bue.

² Nevei dusoyu ae khouko ava nasü daizhou koute bue touyu sü nevei sheeyu ki hinou Eye panou ngaolo.

³ Nevei tobai soumoa zhuvea leshi peiyu na hai hrümai jünoua veipu hie, südonou Enou neye sü paosholai.

⁴ Enou hria buki sasü ne hi kalo pao-a bulai, abah lapoa nou ne hi veachi paolai.

⁵ Khonüh nüyu büa avei rako sü rukhasho-a nou bulai, ae asah souyu lou khesü Enou neye sou sholai.

⁶ Enou züphao hinou dazüa buyu phaki, neye sü licho-a nou bue; kheimathe Enou neye tsücho-a nou bue,

⁷ daiolouzü nenou Eye sü teisa nou soukha peie. Nevei shou khevai nou Enou asayu lou soua bulai.

⁸ Enou neye sü taotei poa nou bue, ae ne bah nou Eye sü pailashu peie.

⁹ Eye southalai tea te-a laiyu maitao hai athai maivei teidei hisü hota bailai.

¹⁰ Puletao hai soureih souyu hinou thai bailai, ae puletao vei pfüphao sü rekhaona nou touloua bailai.

¹¹ Ana veo louzü veiloyu donou Ramai zhih hinou salai. Ramai vei zhih hinou chaachou soukhai touyu mai hrülai nou puhye sü paosholai, ana dahrührüa buyu maitao mü louzü soumu khaiwulai.