LOUTAO 61 - SHEEYU BAIBEL (BSI)

Vupa Peire donou Veachi Paoyu

¹ Oh Ramai, Enou krayu apai sü chou peio, Enou veachi paoyu sü keinou peio!

² Veahosho-a buyu hinou ae aki hinou ka doushoa buyu buh hisünou Enou neye kuwe! Eye panou kaozhou vei-a bailoure buh ali hi save khai peio,

³ daiolouzü Eye kho-apeio nasü ne baie, ae ngaoba maitao bah hinou vupa peire nasü ne baie.

⁴ Eye panou teisa nou nevei sheeyu ki hi bulo; nevei shou khenou Eye panou kaona-a bailouyu sü soupeio.

⁵ Oh Ramai, Enou ne hi apaokhai touyu khesü nenou süwe, ae neye tsükhou-a buyu maitao vei kikaa khesü nenou Eye peie.

⁶ Veo vei hrümai sü po taoli thoupu peio, puhye panou hrü shoshoa hrüyu sü soupeio!

⁷ Oh Ramai, puhye panou teisa nou ne nghoujü nou vebuh hi bulo; ae puhye sü nevei tobai soumoa leshi peiyu ae nevei acheche nou kho peiyu sü soupeio.

⁸ Sübüa Enou neye teisa nou lou sousholai, ae Enou apaokhai touyu thaifüa neye sü Enou teisa nou posheela peilai.