LOUTAO 6 - SHEEYU BAIBEL (BSI)

Veahoyu Phaki Soukha Peire donou Paoyu Veachi

¹ Oh Mapaowo, nevei rarou hinou Eye zü peiso! Nevei lekha rarou nou Eye tudee-a souvea peiso.

² Eye zhuvea leshi peio, Oh Mapaowo; E lelouho shore, Eye khouko peio;

³ E lelou hore alia avei hrümamai veishi nou veashore. Oh Mapaowo, Eye soukha peire teile kasoa kholai hie?

⁴ Tave Eye khailupa peio, Oh Mapaowo; nevei zhuvea leshi hinou Eye athai hinou vupa peio.

⁵ Athai maivei teidei hiwo neye lichoyu hae; Rabedushao hiwo mai ali noua neye paosholou hoe.

⁶ E le veayu nou lelouho shore; kheitsü sü E krayu donou avei züphao chare, avei nghidzü sünou kouh peikhü sü chata baire.

⁷ Eye ngaoba zhubayu mainou anghidzü soupa-a krayu donou anghithou maaloua ha ngaotou louhore.

⁸ Mai ashi maitao, neletao ahinou doushoa tawo! Daiolouzü Enou krayu pai sü Mapao nou kei-nou peiwure.

⁹ Mapao nou avei akho sü noupeie, alia avei veachi paoyu sü puhnou aetou peie.

¹⁰ Eye ngaobayu maitao hai hraongu ngaolai ae pah shisholai; nghiphei touli hinou puletaoye sü hulai bailai.