LOUTAO 58 - SHEEYU BAIBEL (BSI)

Ashi Maiye Tudee peio tea Ramai hi Veachi Paoyu

¹ Nuh teidei kho-a buyu maitao, acheche hinou neletao vei chidei nasü soupei homoe? Neletao nou mai hrülai hi raibütoua chilou khesü kupei moge?

² Neletao nou sükua soumoe! Neletao hai vah ashi soure donou tsü cho-a bubaire, ae teidei hisü panou taida-a bure donou soupei-a baie.

³ Mai ashi maitao hai puletao vei hrümamai teitei nou kaozü moyu hisü ta-a baiwe, puletaoye na louyu teithe hinou dayu chi paopoa ta-a baiwe.

⁴ Puletao hai nghou tushi büa maiye shuthayu pou shi nou phoufüa bue, puletao hai nyou peyu nghouvu büa puletao vei nyou sü kapoa nou bue,

⁵ südonou nghou seijüyu maivei paikho nasü chou more, ae kheikhupado soulou süyu maitao vei paila aveih khesü chou more.

⁶ Oh Ramai, zhaipou shishoa buyu khaosouveo haitao vei huh sü dasha peio.

⁷ Puletaoye sü panou dzü kütayu büa hakata-o, ludu hinou poube buyu khesü mainou headeipoa tayu büa puletaoye sü deisasa peio.

⁸ Khanobvü nou leita loua ngaomo tayu büa puletaoye sü panou ngaomo ta-o, thai-a nou nah nakouyu nahtou ali nou teinghei ngaokhai moyu büa puletaoye sü panou teinghei ava ngaoso.

⁹ Poube phailaiyu büa puletao nou sülumo jünou puletao sü souha-a bailai, puletao hai hria buyu teile hinou Ramai vei lekha rarou sünou houlai bailai.

¹⁰ Cheche maitao nou mahmo soua buyu maitaoye tudee peiyu sü ngaolouyu phaki puletao hai asalai, mai ashi maitao vei zhe hinou puletao hai phi taipoa talai.

¹¹ Maikhe mainou haibüa paolai, “Cheche vuzünou acheche maiye sü buu peiwe; deiphao maiye chiku peiyu Ramai ali bue.”