LOUTAO 57 - SHEEYU BAIBEL (BSI)

Soukha Khoyu Veachi

¹ Eye zhuvea peio, Oh Ramai, Eye zhuvea peio, daiolouzü Enou ne hinou tave bai loure donou vewe. Teikhai teirü ashi chemo koute Enou nevei shouh khe hinou baichao loulai.

² Enou khoyu veishi peiche khoyu Ramai, Kukulai hi Abuo Ramai ye Enou kuwe.

³ Puhnou raki vanou chila sü peilai ae Eye khailu peilai. Eye souvea souchoroyu maitaoye sü puhnou hraongu soupeilai. Ramai nou puhvei tobai soumoa leshi peiyu ae chilee checheyu nasü Eye ngaopeilai.

⁴ Eye sü ngaobayu maitao nou sühao loure, puletao hai maisou touyu khaosouveo raiwe. Puletao vei huh hai heung ae voulouthou büwe, ae puletao vei mali hai hei veishoyu khoche raibütoue.

⁵ Oh Ramai, nevei aduso nasü raki vanou ngaopei khaio, ae nevei aveih ava nasü deiphao hi pongao peikhaio.

⁶ Ngaobayu maitao nou Eye nüloure donou shorü southoua bure, E veaho sho-a nou bu baire. Eye panou deloure donou avei ludu hisü puletao nou deibvü raokhai peie, ana deibvü hisü lah puletao nou delou tare.

⁷ Oh Ramai, avei tsüle teitei nou pei-a neye louchewe, Enou lou soulai ae neye paosholai.

⁸ Arako, tashulo! Tashulo, poa lou souyu avei basei natao, Enou teithepa laiyu phaki kaishu peilai.

⁹ Oh Mapaowo, Enou nevei kalo sü tyahrütao hi paongaolai. Enou mai hrohinou neye paosholai.

¹⁰ Daiolouzü nevei tobai soumoa leshi peiyu hai raki hi khere, ae nevei chilee checheyu hai teihao pei hi khere.

¹¹ Oh Ramai, nevei aduso sü ratei hinou paongao peikhaio, ae nevei kathe nasü deiphao hi ngaopei khaio.