LOUTAO 55 - SHEEYU BAIBEL (BSI)

Khamai Samai nou Thao-a Tayu Maivei Veachi

¹ Oh Ramai, Enou veachi paoyu sü keinou peio; Eye zhuvea peio tea khoyu hinou tavai tapeiso!

² Enou paoyu keinou peio, ae Eye chila peio; E leveayu donou lülou hore.

³ Eye ngaobayu maitao nou pira-a buyu sü E ngaopire, puletao nou do ashi sünou Eye sü souchoro sho-a nou bure. Puletao nou veahoyu sü apei hi pove peie; puletao hai ahi rarou shopoa nou Eye ngaora sho-a nou bure.

⁴ Esü ngaopi sho-a nou bu baire, ae thaiyu sü ngaopi shoa nou bure.

⁵ E ngaopi shoa nou shirürüa bu baire; pei hiyu sünou ahi phoutao loure.

⁶ E hai raohou büa shou bushe touyu thaio veilaire. Enou zhaopoa taho soyu sü ngaoloulai.

⁷ Enou ka doushoa buyu buh hisü zhaota bailai, ae mai hazei touyu vaohro hinou hrüta bailai.

⁸ Teikhai teirü ashi veyu phaki Enou thasho-a turei taloua nou baibu sü phoulou bailai.

⁹ Oh Mapaowo, Eye ngaoba-a buyu maitao vei tsüle sü souhao khaipeio! Enou nuhdu hisü taidayu ae büroyu sü ngao-e,

¹⁰ hea-khei sümoa mahmo souyu, ae veahoyu sünou sühisü sühao poa nou bue.

¹¹ Buhliki hai soushi soukayu khaikho baire, duva veishi hisü dayu ae souchoroyu nou phoutao loure.

¹² Eye ngaoba zhubayu mai ali nou Eye konüa buyu thaio, süsü Enou heamea lou süe; Eye hrai-a ngaorayu mai ali nou khaophu soua buyu thaio, Enou puh nghoujü nou tutsüta-a bailai.

¹³ Ana sünasü nenou baie, avei khamai nou baie, Eye koa toutou sosoyu samai nou baie.

¹⁴ Puh sü Eye koa chiveih chishi phakuwe ae Rathoki hinou koa ratho zho-a laiwe.

¹⁵ Eye ngaobayu maitaoye panou hü chemoa thai theo; puletaoye sü panou hria nou athai maivei teidei hisü hotawo! Ashi nou puletao vei ki hi ae tsüle hisü bu baiwe.

¹⁶ Ana Enou Ramai Mapao hi soukha peio tea kho-e, ae puhnou Eye khailupa peilai.

¹⁷ Enou shona, hea ae khei mathe avei veahoyu ae dopfüa laiyu nasü puh hi chouveyu phaki puhnou avei pai sü keinou peilai.

¹⁸ Eye ngaoba-a buyu maitaoye soureih soua buyu reihbu hinou puhnou Eye kaozhou ashi panou daomoa sa-a dakhai vepeilai.

¹⁹ Teisa nou khasa-a hrüre Ramai nou avei veachi khesü keinou peilai, ae puletaoye sü pada peilai, daiolouzü puletao hai ledayu sü ha-e, ae puletao nou Ramai ye pi moe.

²⁰ Raichoki avei samai nanou puhvei samaitaoye zhuba-a hraitare; puhnou chaachou soukhai touyu nasü pfüphere.

²¹ Puhvei chipao lako hai laivoudzü jünou jüpu hie, ana puhvei tsüle hiolouzü ngaorayu nou phoutao-a bubaie; puhvei chipao khesü theadzü nakhai touyu büe, ana sütao nou khoche hei veiyu büa maiye zhizhu peiwe.

²² Nevei veahoyu khesü Mapao vei bah hi thaothou-o, sükulouzü puhnou neye vupa peilai; tsüle sheesha touyu maiye sü panou hraongu daokhailai moe.

²³ Ana Oh Ramai, nenou maiye southayu maitao, ae daruyu maitaoye sü panou hü hrüchemoa khü hi pothou khaipei bailai. Anou Ewo louzü neye louche-a bulai.