LOUTAO 53 - SHEEYU BAIBEL (BSI)

Deiphao Maivei Ashi

¹ Voyu mai nou lah puletao hisü “Ramai ha-e” tea paowe. Puletao hai hrü ashi hinou hrüa bure, ae ngaorayu vah haso khesü soupfüre; vah aveih souyu mai ali-a hazeire.

² Ramai nou deiphao maiye raki vanou zhukou tsü veiyu mai aliro buhasa ae puhye thoyu mai ali-a buho mosa tea zhuwe.

³ Ana puletao mai hrülai sü kaodu takhaire; puletao mai veishi nou shitakhai toure. Vah aveih souyu mai ali koute-a hazei toure.

⁴ Ramai nou noue, Vah ashi soua laiyu maitao hai puletao hi tsüdo aveih hare touyu sümoho? Puletao hai avei maitao hinou shaotou shaoso-a bubaire, ae ahi puletao nou veachi paokhai moe.

⁵ Ana puletao hisü raichoki ve daokhai moyu ngaopi khesü velai, daiolouzü Ramai nou puhvei maitaoye ngaobayu maitao vei rao khesü porarou laiwulai. Ramai nou puletaoye sü laiwure, südonou Israel mainou puletaoye sü soungu peilai.

⁶ Israel maiye khailupa peire nasü Zion hinou velai! Ramai nou Israel maiye savayu sü peida khaiyu phaki puletao hai daizhou koute asa laisa!