LOUTAO 49 - SHEEYU BAIBEL (BSI)

Vavayu donou Kinitaoye Loucheyu

¹ Deiphao mai hrülai, hai hai sülo! Hai sü kei noulo, buh likinou hrüa buyu maitaore,

² tai-du ae toungi touha sümoa mai hrülai nou hai sü keinoulo.

³ Avei mü hinou ratsü khesü raopalai, ae Enou tsüchoyu hai sheesha baie.

⁴ Enou tsüchi khesü keinoulai; Enou lanabvü sü ka-a nada ko khesü paopeilai.

⁵ Ngaoba maitao nou Eye sühaoloua kaozhou shishoa buyuma Enou ngaopi laimoe,

⁶ toungi shoa buyu maitao, ae puletao vei kini vanou khaophu soua laiyu maitaoye sü Enou pilai moe.

⁷ Mai ali koute-a lah nou lahye khailupa louhoe; puhnou puhvei hrümamai muh hai Ramai hi khapei louhoe,

⁸ daiolouzü mai ali vei hrümai muh hai teishoe. Puhnou hasou kilia muhma nou peia

⁹ khü hi lou more donou, ae teisa hriloure donou khapei louhoe.

¹⁰ Mai hrülai nou ngaowe, süolouzü hasüyu mai-a, voyu mai-a ae vavayu na-a thaita khai-a baiwe. Puletao mai hrülai nou puletao vei nangi khesü puletao vei toudzü hi khaidai-a ta baiwe.

¹¹ Puletao hria bukio teidei taoli hai lah puletao vei soua nou bue, anou chuo khü nanou teisa puletao ki soulaire, sühinou puletao hai teisa nou bua bailai.

¹² Dusoyu mai koute-a athai hisü nou tureipa louhoe, soukhaona ali bütoua puletao hai thaita bailai.

¹³ Lahye louche-a buyu maitao hisü dai-e vepawe touyu sü zhukhaio, lah vei kini buyu khesü ngaoloua rukha-a nou savashoa buyu maitaoye sü zhukhaio—

¹⁴ puletao hai zhaotu ali büa thai bailai, ae Athai touyu nanou puletao vei zhaokhopu soulai. Acheche mai nou puletao jünou veiloulai, puletao vei ki jünou dousho-a buyu athai maivei teidei hi hotayu phaki, puletao vei pfüphao hai thasho-a nou nai vita bailai.

¹⁵ Ana Ramai nou Eye vupa peilai, puhnou Eye athai vei khouko hinou khailupa peilai.

¹⁶ Mai ali nou toungi payu phaki, puhvei kini khesü pousho pare tea leveaso,

¹⁷ sükhesü puhnou thaitayu phaki pfüta louhoe; puhvei nangi khesü puhye koa khü hi louta laimoe.

¹⁸ Mai ali hai puhvei hrümai hinou savashoa buyuma, ae puhnou veilouyu donou mainou puhye paosho-a buyuma,

¹⁹ puhvei paipaoh maitao büa puh-a thaita bailai, ae puhnou ava nasü ngaopulou laimoe.

²⁰ Dusoyu mai koute-a athai hisü nou tureipa louhoe, soukhaona ali bütoua puh-a thai bailai.