LOUTAO 48 - SHEEYU BAIBEL (BSI)

Zion, Ramai vei Nuhdu

¹ Mapao hai dusho-e, puhye sü puhvei sheeyu deichi, ae Etao Ramai vei nuhdu hinou paosho züe.

² Ramai vei deichi, Zion hai kushoe ae hüveih shoe, dusoyu veo vei nuhdu haina nou deiphao mai hrülai hisü savayu hai pove peiwe.

³ Nuhdu sükhevai hai Ramai ye koa buyu thaio kaozhou vei bailai touyu sü puhnou soungao peie.

⁴ Veo maitao nou tave me zholoua nou Zion Deichi hisü reih soulai tea veloue.

⁵ Ana puletao nou tave hainaye ngaolouyu phaki, puletao hai khupare; puletao hai ngaopiloua tudakhai tare.

⁶ Puletao hai ngaopi sho-a nou ngurürüre, ae naotumai nou nah nalaiyu phaki khya souyu büa soure,

⁷ ae teikhai teirü ashi sünou dzülukiye hüve shoyu büa shore.

⁸ Etao nou Ramai vei vah haso khesü chouyu büa chuo Khoukhoulai Mapao, Etao Ramai nou nuhdu hinou soupfüyu vah khesü Etao vei nghithou nou ngaoloure. Nuhdu nasü puhnou teisa panou kaozhou vei bua bailai.

⁹ Oh Ramai, nevei Rathoki hinou Etao nou nevei tobai soumoa leshi peiyu nasü lichowe.

¹⁰ Buh veishi hinou neye sü maikhe mainou paoshowe, ae nevei kathe hai deiphao teitei hi süve khaire.

¹¹ Zion hi maikheye sü panou asalo! Nenou acheche hinou chilou khesü kupeie, Judah hi nuhdu khesü panou savalo!

¹² Ramai vei maitaore, Zion sü tasühao poa kipeitaoh khesü phoukhaio;

¹³ sühi kivo khesü kabüa bue touyu shilo, ae kaopo pokhai toyu khesü zhutoulo, sübüa bonakha hi sütao hai kakua bue touyu khesü paongao peio:

¹⁴ “Ramai haina hai teisa nou Etao vei Ramai nasü soulai; vere teile veishi hia puhnou Etaoye süthaisa-a tapeilai.”