LOUTAO 47 - SHEEYU BAIBEL (BSI)

Dusho kayu Kho-apeio

¹ Deiphao mai hrülai, asah soua bah taokhaio! Shusoua lou soua nou Ramai ye paosholo!

² Kukulaiwo Mapao ye sü ngaopilo; puh hai dukayu veo nasüe, puhnou teideiphao veishi pei hinou khasa-a bue.

³ Puhnou Etaoye mai kukhe jünou kolouyu nasü peie, ae puhnou tyahrütaoye Etao vei khakhe hi khaipeie.

⁴ Etao nou hrüa buyu teidei hainasü puhnou Etaoye donou dopa khaipeie, puhnou leshiyu puhvei maitaoye panou khekai souloure donou peie.

⁵ Ramai nou puhvei vebuh hisü takhe buloure. Mapao nou takheyu phaki asayu nou shurao soupoa ae shabe nghoupoa nou khe-e.

⁶ Ramai ye sü lou nou sousho khaio, Etao vei veoye lou sousho khaio.

⁷ Ramai nou teideiphao teitei pei hi veo nasüe, puhye sü lou nou sousholo!

⁸ Ramai hai puhvei sheeyu vebuh hinou bue; puhnou tyahrü hrülai pei hinou khasa-a nou bue.

⁹ Tyahrütao vei veo nahpoutu maitao hai tave Abraham Ramai vei maitaoye koa jüa bure. Puh hai deiphao hi reihmaitao veishi jünou khouko bupu hie, puhye sü pokusho khe khaipeie.