LOUTAO 46 - SHEEYU BAIBEL (BSI)

Ramai nou Etaoye Salai Peie

¹ Ramai hai Etao vei baibuh ae pfüchi nasüe, veahoyu phaki soukha peire nasüe.

² Südonou teideiphao pepo tayuma ae deichitao hai zai hi delou tayuma Etao hai ngaopi laimoe;

³ zaidzü nou khüa kopayuma, ae deichi khenou lüa ngushi shoa buyuma pilai moe.

⁴ Sühisü rei ali nou Ramai vei nuhdu, Kukulaiwo vei sheeyu ki hisü savayu hai küve peie.

⁵ Ramai nou nuhdu sühisü bue, ae nuhdu sünasü shikhai toulai moe; Ramai nou soukha peikoute-a bubailai.

⁶ Tyahrütao sü ngaopi sholai, vedei khesü pepo talai; Ramai nou teisüyu büa rapeie, ae teideiphao sü pepo talai.

⁷ Khoukhoulai Mapao nou Etaoye salai peie; Jakob vei Ramai hai Etao vei baibue.

⁸ Mapao nou soupei khaitouyu nuh khesü tave zhukhaio. Deiphao hi puhnou khupayu vah haso soukhai touyu khesü zhukhaio.

⁹ Puhnou deiphao veishi hi soureih souyu nasü nuchao khaire; puhnou voulou khesü souchawure, heung khesü sousha laire, ae rü khesü meidei laire.

¹⁰ Puhnou paoe, “Züvei khaisou baio, ae E hai Ramai-e touyu sülo, E hai tyahrü hrülai pei hinou ae teideiphao pei hinou dukayu nasüe.”

¹¹ Khoukhoulai Mapao nou Etaoye salai peie, Jakob vei Ramai hai Etao vei baibue.