LOUTAO 45 - SHEEYU BAIBEL (BSI)

Veo Maivei Shinghire Lou

¹ Enou veoye donou lou ali dapalai tea dayu phaki, avei tsüle hi chipao laqo aveih nou phoutao pfüa bue; larü rüveiyu mai ali vei rüsü büa avei müli hisü chipao veihli nou bue.

² Mai hrülai jünou ne-a hüvei ka-e; chi paolou süyu sü ne hi peikhai toue, südonou Ramai nou neye teisa nou shiha peie.

³ Oh Aduso nare, nevei khouko ava ae veilou kolouyu sünou nevei khoche sü khya hi khipfülo.

⁴ Acheche ae kaozü naye vupa peire donou nevei vemai rhei sü ngalouyu hinou pfüa vepeio, nevei bah zhoulo vanou khupayu vah khesü doupeio.

⁵ Nevei voulouthou hai pei tsüsho-e, sünanou neye ngaobayu maitao vei lüthou hi vuthou peie; sübüa tyahrütao hai ne phi hi kaodu koua baiwe.

⁶ Ramai nou neye peikhai touyu vedei nasü teisa nou akhai ha-a bukou telai. Nevei maitaoye sü nenou kaozü hinou khasa-a hrüpeilai;

⁷ nenou acheche nasü jüpa-e ae ashi nasü ngaora-e. Südonou Ramai, nevei Ramai nou neye sü dokupa loue, ae mai kukhe jünou neye sü savayu hai peipue.

⁸ Nevei sabanü hisü poukai nüvei myrrh ae aloes nou napei khaitoue; praongi nou soukhai touyu vebuh hinou neye sü lou souyu mainou sousava peia nou bue.

⁹ Veo maivei nahnaotutao nou nevei vebuh hisü koa bue, ae veopfüpai sünou veikayu sana nou soukhai touyu sana zhu khesü tupoa nevei vebuh zhoulo vanou lapoa bue.

¹⁰ Veo chapfü soure naotupai, Enou paoyu achi keilo— nevei maitao ae nevei kityarai maitaoye ngai-o,

¹¹ Veo nou nevei hüveiyu sü ngaoloua thainülai; puh hai nevei paopue, südonou puhnou paoyu chi zülo.

¹² Tair hi maitao nou neye sapeina khesü pove peilai, ae toungiyu maitao nou nevei jüpa nasü ngaoloure donou telai.

¹³ Veo nahnaotu pai hai vebuh hinou bue— puh sü daizhou koute hüvei sarou! Puhvei sabanü hai sana raipo nou dao khaitoue.

¹⁴ Veishoyu sabanü nou tupoa honapai sü veo hi saloue, puh thaifü poa nou loumaina taolinou puhye sü veo hi salou peie.

¹⁵ Savasho-a nou puletao hai veo nou buyu buh hisü taloue.

¹⁶ Oh puo veo, nevei puopaoh maitao thaosü ne hai nahpoutu mai taoli hrüloulai, ae nenou puletaoye sü deiphao teitei hi panou veo souloulai.

¹⁷ Avei lou sünou nevei kathe hai panou teisa buloulai. ae mai hrülai nou neye sü teisa nou paosho-a bulai.