LOUTAO 44 - SHEEYU BAIBEL (BSI)

Vupa Peire donou Veachi Paoyu

¹ Oh Ramai, raichoki nenou Etao vei poupaoh maitao hi soupfü peikhai touyu vah haso khesü, puletao nou Etao hi paongao peiyu hai Etao nou vuzünou choure.

² Nenou kabüa cheche moyu rahtaoye tho-a buyu tyahrütaoye hulai peie, ae nevei maitaoye puletao vei teidei hinou soushu peie touyu; kabüa tyahrü kukhetaoye nenou tudee peiyu ae nevei maitaoye sousava peiyu khesü Etao nou choue.

³ Nevei maitao hai puletao vei teidei sü khoche nou poa kolou moe, puletao nou soureih veilouyu hai lah puletao vei khouko vanou moe; ana nevei khoukho, ae nevei pfüchi, ae nenou kozho peia salai peiyu donou baie, daiolouzü nenou puletaoye sü leshi peie.

⁴ Ne hai avei veo süe ae avei Ramai nasüe, nenou nevei maitaoye veilou ngalouyu nasü peie.

⁵ Nevei khouko vanou Etaoye ngaobayu maitaoye sü Etao nou soukanghei peie.

⁶ Enou avei voulou nasü louche moe, moyuma avei khoche nou Eye khailupa peilou hoe.

⁷ Ana nenou Etaoye sü ngaobayu maitao hinou khailupa peie, ae Etaoye ngaorayu maitaoye sü soukanghi peie.

⁸ Ramai zhih hinou Etao nou khaophu soua bukou telai, ae neye paosho-a kalo sü teisa nou pao koute-a bulai.

⁹ Ana nenou chuo Etaoye laire, ae Etaoye sü panou hraongu ngao-a bure; nenou Etao vei reihmai meye sü koa tapei more.

¹⁰ Nenou Etaoye sü panou ngaobayu maitao nghoujü nou tutare, ae puletaoye panou Etao vei na buyu veishi sü poloure.

¹¹ Nenou Etaoye sü zhaotu dathayu büa panou dathawure; ae Etaoye soura rouposhu vakou maivei teidei veishi hi khaipeie.

¹² Muh lia hayu na ali büa nevei maitaoye sü nenou muh lapa-a nou zholaiwure.

¹³ Nenou Etao hi soupeikhai touyu vah khesü Etao vei kinapa maitao nou ngaoloua Etaoye konüa bure.

¹⁴ Etaoye sü nenou tyahrü kukhe maivei jünü soupeire. Puletao nou Etaoye sü konüa puletao vei pei ngu-a nou bure.

¹⁵ Esü pah veimoa bukoute-a baire, ae hraongu nou Eye holoure,

¹⁶ daiolouzü Eye ngaobayu maitao nou konüa Eye paoshiyu khesü choulouyu donou.

¹⁷ Etao nou neye ngaimoa bulukhu, moyuma nevei Vo nasü pfüthomoa buyuma haibüyu teitei sü Etao hi vepa-a nou bure.

¹⁸ Etao nou neye louche moyu sü soumoe, Etao nou nevei chikha khesü züba moe.

¹⁹ Ana nenou Etaoye panou souloure khouko ali-a hazei teanou rekhaona hrohi khaipeiwure; nenou Etaoye sü zhitei touyu buh hi thoukhai peiwure.

²⁰ Etao nou Ramai ye thoyu sü thaowua vakou maivei rah hi veachi paotayu thaio,

²¹ nenou süsü phoupalou vuzüa bailai, daiolouzü Etao vei tsüle veishi sü nenou süe.

²² Ana Etaoye zhaotu dathayu büa southa peikoute-a buyu haikhe teitei sü nenou süwe.

²³ Mapao, kushulo! Daidonou ne zhitawe? Tashulo! Etaoye teisa nou malai peiso!

²⁴ Daidonou ne Etao hinou tutsü tawe? Etao nou sounou souyu ae veahoyu khesü ngaipeiso!

²⁵ Etao hai deiphi hi kaokou bure; Etao hai veilou hoa deinai hinou kou dazüa bure.

²⁶ Etaoye tave soukha peio! Nevei tobai soumoa leshi peiyu nou Etaoye khailupa peio!