LOUTAO 41 - SHEEYU BAIBEL (BSI)

Sounou Souyu Mainou Veachi Paoyu

¹ Touha soha-a laiyu maiye donou tsücho peiyu maisü vasayu mai soulai; puletao nou veahoyu phaki, Mapao nou puletaoye sü soukha peilai.

² Mapao nou puletaoye sü kiko peilai ae vupa peilai, ae puhnou puletaoye sü puletaoye ngaobayu maitao bah hi thaothou peilai moe.

³ Puletao nou sounou soua buyu phaki Mapao nou puletaoye sü soukha peilai ae puhnou puletao vei sounou veishi sü souvei peilai.

⁴ Enou paoe, “Oh Mapaowo, Eye zhuvea peio, avei sounou sü souvei peio, daiolouzü Enou ne nghoujü nou mah souwure.”

⁵ Ngaobayu maitao nou Eye sü paoshi-a laiwe. Puletao nou E thaitayu ae Eye lichopu moyu nasü jüpa-e.

⁶ Puletao hai tsüle ashi pfüa tave Eye zhuwe, avei ko ashi pfüphou sü puletao nou pojüloua vako tapayu phaki sütao sü mai hrülai hi pao-a laiwe.

⁷ Eye ngaorayu mai hrülai hai kheikheisoua nou achi phawe, ae Eye soushipu peire donou tsücho-a bue.

⁸ Puletao nou haibüa paoe, “Puh hai sounou ashi souloure; chuo puhnou züa buyu züphao hinou kushupu louhore.”

⁹ Enou louche kayu avei samai, Eye koa toutou soso souyu samai koute-a chuo Eye ngaoba tare.

¹⁰ Oh Mapaowo, Eye zhuvea peio, ae Eye souvei soulashu peio, sükulouzü Enou puletao paoh sü khapeilai.

¹¹ Haibüa soupei louzü Enou süloulai, sülouzü nenou Eye jüpawe, daiolouzü Eye ngaobayu maitao nou ajünou veilou laimoe.

¹² Enou kaozü nasü souyu donou nenou Eye soukha peie, nevei ngheingao hinou Eye teisa nou khaipeio.

¹³ Israel maivei Ramai Mapao ye paosholo! Puhye teisa nou paosho-a bulo! Amen! Amen!