LOUTAO 39 - SHEEYU BAIBEL (BSI)

Veahoyu Mainou Mahlayu

¹ Enou paoe, “Avei müli ye panou chi pao mah more donou E soutaosoua nou hrülai; mai ashi mainou anghiki buyu phaki E chi ali koute-a raolai moe.”

² E raokhai toumoa zei tea nou bue, veiyu chi koute-a pao moa nou bue! Ana Enou veayu sü shipulailai-a baire,

³ ae avei tsüle hisü leveayu nou phoutao-a baire. Enou tsüchopu khaie, Esü veahopua baire; südonou E chi noumo louhoa chinouwe:

⁴ “Oh Mapaowo, E teile kasho-a hrükou laige? E duki thailaie? Avei hrümai sü dukinou kou akhai soulai touyu ahi paongao peio.”

⁵ Daizhou koute avei hrümaitou sü jüshoa nou nenou soupeie! Nevei nghingao hiolouzü avei hrütou hai hazhotou lia moa nou ngao baie. Emai vei hrütou hai cheche vuzünou teikhai hüphou veyu büa baie,

⁶ khungu ali büa hata-a baie. Puhnou soupfükhai touyu veishi sü hamako baie; puhnou kini pojü khaitue, ana thaonou poloulai touyu sü puhnou sümoe.

⁷ Süthaisü, Oh Mapaowo, Enou dai-e vuzhi-a bulaige? Avei areih nasü ne baie.

⁸ Avei mahmo teitei sü khaipeio, ae voyu maiye panou Eye konü peiso.

⁹ E chi lia rao moa nou zei tea bubai laire, daiolouzü Enou haibüa veahoyu teitei sü nenou soupeia baie.

¹⁰ Eye souveapu peiso! Nenou Eye dapeiyu donou Esü thailaire.

¹¹ Etao nou mahmo souyu donou nenou tukha peiwe, ae Etao nou leshi sho-a buyu nasü rüh nou toulouyu büa nenou souha peie. Cheche vuzünou Emai vei hrütou hai teikhai hüphou tea veyu büa baie.

¹² Oh Mapaowo, avei veachi sü kei peio, ae Enou krayu avei pai sü nou peio; Enou kra-a buyu phaki tave Eye soukha peio. Avei puopaoh maitao büa phajütouli chaosore donou nevei kishemai soua Esü ve-a baie.

¹³ Enou tarata mojü ae hatamo jünou Eye panou teile daotouli sava-a buloure donou nevei nghithou sü ahinou pheivai peio.