LOUTAO 37 - SHEEYU BAIBEL (BSI)

Mai Ashimai ae Mai Aveih Mainou Vebure Buh

¹ Mai ashi maiye donou tsücho-a leveaso; moyuma vah kaomoa souyu maiye thainüso.

² Puletao hai thashoa nou pounghou büa hata bailai, ae poudai büa kita-a bailai.

³ Mapao ye louchelo ae vah aveih soulo; sükulouzü neletao hai kaozhou vei-a neletao vei teidei hinou hrüloulai.

⁴ Savayu nasü Mapao hinou phoulo, ae puhnou neye sü nenou jüpa-a buyu veishi ne hi peilai.

⁵ Mapao bah hi nevei hrümai teitei nou thaothou peio; puhye louchelo, ae puhnou neye soukha peilai.

⁶ Puhnou nevei acheche nasü panou tei thepayu phaki vapayu büa va peilai, ae nevei kaozü nasü hea touchü teinghi ava büa panou valai.

⁷ Heamealo ae Mapao vei vu khoa bulo; lah vei jüpa hinou soupfüa laiyu maitao nou vasayu nasü ngaoloua thainüso, moyuma do ashi soupfüyu hinou veilouyu maitaoye donou leaveaso.

⁸ Rarouyu sü khailo, ae rapayu sü thaokhaiwo; hai nanou ashi hisü süthaisa-a louta baiwe.

⁹ Mai ashi maitaoye sü souha bailai, ana Mapao vei vu kho-a buyu maitao nou teidei nasü thaoloulai.

¹⁰ Thasho-a nou mai shiyu maitao hai hakata-a bailai; nenou puletaoye phou-a laiyuma puletaoye sü ngaopu laimoe.

¹¹ Ana tainoutou soua laiyu maitao nou teidei nasü puletao vei souloulai, ae puletao nou sava-a nou ae kaonaphi teanou teidei hisü hrülai.

¹² Mai shiyu maitao nou acheche maitaoye soushi peilai tea rowe, ae puletaoye ngaora shoa nou huh tukeke poa zhuwe.

¹³ Ana Mapao nou mai ashi maiye sü konüe, daiolouzü puletao hai thasho-a nou hata bailai touyu sü puhnou süwe.

¹⁴ Touha-a nou veaho laiyu maiye southare donou, ae acheche maiye souhare donou mai ashi maitao hai puletao vei khoche sü paipa loure, ae puletao vei voulou sü paipa loure,

¹⁵ ana puletaoye sü lah puletao vei khoche vanou southa loua bailai, ae puletao vei voulou khesü chata bailai.

¹⁶ Mai aveih mai ali nou thoudzü daotou buyu nasü mai ashi mai hrülai vei kinitao jünou muhteipu hie,

¹⁷ daiolouzü Mapao nou mai ashi maivei pfüchi sü pota bailai, ana mai veiyu maiye sü vupa peilai.

¹⁸ Mapao nou puh chi züa buyu maitao sü kiko peilai, ae teidei sü teisa nou puletao vei souloulai.

¹⁹ Teile ashi veyu phakia puletao hai veaho laimoe, ae tokaa veyu phakia puletao hai toujü sojüyu sü soulai moe.

²⁰ Ana mai ashi mai hai thaita bailai, Mapao ye ngaobayu maitao hai rekou poupa büa hata-a bailai, puletao hai meikhao büa ngaomota-a bailai.

²¹ Mai ashi mai hai pou-pao loulai, ana maivei paoh-zho khapei bae, anou mai aveih mai louzü lela veisho-a nou maiye pei koute-a baiwe.

²² Mapao nou shiha peikhai touyu maitao nou teidei sü thaoloulai, ana puhnou chaa peikhai touyu maitaoye sü hulai-a bailai.

²³ Mapao nou mai aveih maivei ludu sü khosa-a tapeie, ae puh jüpa soua buyu maitaoye sü vupeiwe.

²⁴ Puletao nou kaoduta-a buyuma sübüa bukoute laimoe, daiolouzü Mapao nou puletaoye sü soukha pei-a bailai.

²⁵ E hai chuo tsüpare, teile taoli E hai hrükoure, ana Mapao nou mai aveih maiye thaokhaiwuyu sü E ngaokhai toumo hie, moyuma puletao vei nahmaitao nou tosüa laiyu ngaomo hie.

²⁶ Puletao hai tobai soumoa maiye peizhi koutewe, ae maiye pou-pao pei koutewe, ae puletao vei toudzütao hai shiha ngao-a baie.

²⁷ Vah ashi souyu khesü thaokhaiwua vah aveih soukhaio, sükulouzü neletao vei tyaosholea maitao nou teidei hisü teisa nou veia hrülai.

²⁸ Daioluzü Mapao hai kaozü vah souyu nasü jüpa-e, puhnou puletaoye sü teisa nou vupeilai, ana mai ashi maivei tyaosholea maitaoye teidei hinou hulai bailai.

²⁹ Acheche mainou teidei sünasü poloulai, ae puletao sühinou teisa nou hrülai.

³⁰ Mai aveih maivei mü hinou ratsü sü paopeiwe, ae puletao vei müli hinou kaozü nasü paopa peiwe.

³¹ Ramai vei chikha khesü puhvei tsüle hinou bue, ae sühinou puh sü latakhai chamoe.

³² Mai ashi mainou checheyu maiye sü kho-a nou bue, ae puletaoye southare donou da-a nou bue.

³³ Ana Mapao nou puletaoye sü mai ashi mai bah hi thaothou peilai moe, moa puletaoye chikuyu phaki, puhnou puletaoye sü mah duka peilai moe.

³⁴ Mapao vei vu sü zhilo, ae puhvei chikha khesü zülo; puhnou neletaoye tsükhouyu hinou teidei nasü neletao hi peilai, ae mai ashi maiye hulaiyu sü neletao nou ngaolai.

³⁵ Mai ashi mai ali hai khouko pfüshoa nou duso payu Enou süe, ae puh hai Lebanon hi sedar süübe büa kusho payu Enou ngao-e,

³⁶ ana haithai naki Enou buh sühi taveyu phaki, puh sü buh sühinou hare; Enou puhye phou-e, ana puhye sü phou hare.

³⁷ Mai aveih maiye zhusheelo, acheche maiye zhutou toulo; kaona-a nou hrüyu mai hai tyaosholea veie,

³⁸ ana mahmo soua laiyu maiye sü souha baiwe, ae puletao vei toudzütao hai hakata-a baiwe.

³⁹ Mapao nou acheche maiye sü khailupa peiwe, ae puletao nou veahoyu phakia vupa peiwe.

⁴⁰ Puhnou puletaoye sü soukha peie ae vupa peie; puhnou puletaoye sü mai ashi mai bah hinou khailupa peie, daiolouzü puletao hai puh hinou tave baibuh soua buloure.