LOUTAO 35 - SHEEYU BAIBEL (BSI)

Soukha Khoyu Veachi

¹ Oh Mapaowo, Eye dua buyu maitaoye sü nenou du peikhaio, ae Eye züvei-a buyu maitaoye sü nenou züvei peio!

² Nevei rü ae reihna khesü pfüloua Eye tave vupa peio.

³ Nevei heung sü poloua Eye thaihuyu maitaoye sü dupeio. Eye khailupa peilai tea nenou ahi paopeio.

⁴ Eye southalai tea buyu maitaoye sü panou hraongu ae kangheiyu sü southeo! Eye soushilai tea buyu maitaoye sü panou büroloua thailo dakhai tayu sü soupeio!

⁵ Mapao vei rakivamai nou puletaoye thaingou tayu phaki puletaoye sü panou teikhai nou hüpoa tayu rouvao büa ta-o!

⁶ Mapao vei rakivamai nou puletao thailo tayu phaki, puletao vei ludu sü panou zhitei toulo ae jüpyapya peio!

⁷ Puletao nou züyu ali koute-a ha-a nou Eye nüloulai tea rüh southouwe, ae deibvü thoushoa nou raokhaiwe.

⁸ Ana puletao nou süloumo jünou kaozhou ashi nanou puletao hi ve-a bailai; puletao nou southou khaitouyu rüh hisü lah puletaoye muloua bailai, ae puletao nou hekhai touyu deibvü hisü puletao hai lah deloua bailai.

⁹ Süthaisü Mapao zhih hinou E asa sholai, ae puhnou Eye khailupa peiyu donou E asalai.

¹⁰ Avei tsüle teitei nou peia Mapao hi E haibüa paolai, “Neye raiyu mai ali-a hae! Nenou lülou hoyu maiye khouko buyu mai bah hinou vupa peie, touha-a nou mainou souvea hoyu maitaoye sü nenou vupa peie.”

¹¹ Mai ashi maitao nou Eye da-a nou shaki soupeie, ae Enou sükhai toumoyu mahmo khesü apei hi paoduka khaipeie.

¹² Aveih na thaosü puletao nou Eye ashi nou paoh kha peie, südonou Esü leveare.

¹³ Ana puletao nou sounou souyu phaki, Enou puletaoye donou dopfü peie; Enou ha toumoa puletaoye donou apei pfünakou veachi paopeie.

¹⁴ Enou avei samai ali moyuma thaihou jürai mai ali büa puletaoye donou veachi paopeie, mai ali nou puh pfü thai-a dopfüyu büa puletaoye donou dopfü peie.

¹⁵ Ana Enou veahoyu phaki, puletao mai hrülai nou asah sü soua baiwe, ae apehao hinou ve sühao poa Eye konüa bubaiwe; Enou sümoyu shetumai koute-a Eye taida-a baiwe.

¹⁶ Puletao nou Eye ngaophou moa nou konü peiwe, ae ngaora shoyu zhaidou hinou Eye zhuwe.

¹⁷ Oh Mapaowo, teile kasho haibüa Eye zhua bukou laige? Puletao nou Eye soushilai tea buyu hinou vupa peio, ae khaosouveo haitao hinou Eye khailupa peio.

¹⁸ Süthaisü Enou maisou vejüa buyu hinou nevei kalo khesü paolai, mai hrülai nghoujü nou neye Enou paosholai.

¹⁹ Eye ngaobayu maitao, ae dahrührüyu maitaoye panou Eye konüa ngaophou moyu sü soupeiso. Halia moyu hinou Eye ngaora-a buyu maitaoye panou avei veahoyu hisü nou sayu sü soupeiso.

²⁰ Puletao hai chi la aveih paota moe, ana kaonayu jüpa-a buyu maitao pei hisü dayu chi tyatyali nou paopeia baiwe.

²¹ Puletao nou da-a Eye haibüa mah duka peiwe, “Nenou souyu vah sü Etao nou ngaowe.”

²² Ana nenou hai khesü ngaowe, Oh Mapaowo. Südonou ngasou bupeiso, Oh Mapaowo, ahinou dousho-a nou bupeiso.

²³ Oh Mapaowo, ne lah kushuloua Eye vupa peio, avei zü donou tashu peio, avei Ramai-e.

²⁴ Oh Mapaowo, ne hai acheche nasüe, südonou Eye mah ha-e tea paopa peio; Eye ngaobayu maitaoye panou Eye konüa bupeiso.

²⁵ Puletaoye panou haibüa paoyu sü soupeiso, “Eletao nou jüpa-a buyu nasü ngaoloure! Eletao nou puhye sü huta loure!”

²⁶ Enou veahoyu phaki, Eye konüa buyu mai hrülaiye sü panou hraongu ngaoyu sü soupeio ae puletaoye panou bürarou buyu sü soupeio. Ajünou veipu hie tea khayu maitaoye sü panou hraongu ae veahoyu sü ngaolo.

²⁷ E kao-a baie tea paoyu jüpa-a buyu maitaoye sü panou savayu hinou shusoua haibüa teisa nou shapao khaio, “Mapao hai daizhou koute du-e! Puhvei kilai nanou veilouyu sü puhnou jüpa-a bubaie.”

²⁸ Süthaisü Enou nevei acheche nasü shapaolai, ae Enou neye teisa nou paosholai.