LOUTAO 34 - SHEEYU BAIBEL (BSI)

Ramai vei Aveih naye Paoshoyu

¹ Enou Mapao kalo pao-a bukou telai, Enou puhye teisa nou paosholai.

² Puhnou soupeikhai touyu vah hasotao donou E puhye paosholai; mainou souvea hoyu maitaoye panou chouloua asalai.

³ Eye koa nou Mapao vei aduso nasü shapao khaio, puh zhih sü koa nou paosho laikhe.

⁴ Enou Mapao hi veachi paoe, ae puhnou Eye chila peie; Enou ngaopi-a buyu veishi hinou puhnou Eye vupa peie.

⁵ Mainou souvea hoyu maitao nou puhye zhuloua asayu sü ngaoloua; puletao hai hraongu ngaokhai toulai moe.

⁶ Lülou hoyu maitao nou puhye kuyu phaki, puhnou puletao hi chila sü peie; puletao nou veahoyu teitei hinou puhnou puletaoye khailupa peie.

⁷ Mapao ye tsükhoua buyu mai hrülaiye sü rakivamai nou kho peiwe, ae kaozhou ashi veishi hinou puletaoye vupa peiwe.

⁸ Mapao hai daizhou koute veiwe touyu sü neletao lah phoupalou khaio. Puh hinou baiyu buh soua bulouyu maitao hai asayu maitaore.

⁹ Mapao ye tsükhoulo, puhvei mai hrülai; puh chi züa buyu mai hrülai hai puletao nou jüpayu khesü ngaoche loulai.

¹⁰ Souveo koute-a pouzüa laiwe, ana Mapao vei chi züa buyu mai louzü chelujüyu sü soulai moe.

¹¹ Nahle maitaore, ahi tavelo, ae Enou paoyu avei chi sü keilo, Enou neletao hi kabüa Mapao ye tsükhou loulai touyu sü doupeilai.

¹² Sava nou hrüyu sü jüpa homoe? Hrümai so-a nou vasho-a buyu sü jüpaho jüpa moge?

¹³ Sütao hai jüpawe toulouzü, chi la ashi paoso, ae dayu chi paoso.

¹⁴ Ashi vah souyu khesü thaokhaiwua vah aveih soulo, nevei tsüle teitei nou pei-a kaonayu nasü phoulo.

¹⁵ Mapao nou acheche maiye sü zhu peiwe, ae puletao nou kra-a khoyu pai sü keinou peiwe.

¹⁶ Ana ashi vah souyu maitao hinou puhvei zhu sü pfüvai ta-a baiwe, südonou puletao hai thaita baiwe ae deiphao mai nou puletaoye ngai-a baie.

¹⁷ Acheche mainou Mapao ye kuyu phaki, puhnou keinou peiwe; puletao nou veaho-a buyu teitei hisünou puhnou puletaoye vupa peiwe.

¹⁸ Le pepoa buyu mai hisü Mapao nou nghitei-a bupeiwe; dongai pfüa areih lia hayu maiye sü puhnou khailupa peiwe.

¹⁹ Acheche mainou veahoyu sü alao sou ve daowe, ana sütao teitei hinou Mapao nou puletaoye sü khailupa peie.

²⁰ Mapao nou puletaoye sü soutaosou-a kiko peiwe, puletao vei rao ali koute-a panou chata moe.

²¹ Ashi nasünou mai ashi maiye sü southa bailai; acheche maiye ngaora-a paoshiyu maiye sü tudee peilai.

²² Mapao nou puhvei maitaoye sü khailupa peilai, puh hinou tave bailoulai tea veyu maiye sü puhnou vupa peilai.