LOUTAO 30 - SHEEYU BAIBEL (BSI)

Kalo Paoyu Veachi

¹ Enou neye paosholai, Oh Mapaowo, daiolouzü nenou Eye khailupa peie, ae ngaobayu maitaoye panou Eye jünüa asah soua bumoe.

² Oh Mapaowo, avei Ramai, Enou kra-a ne hinou soukha peio tea khowe, ae nenou Eye souvei peie.

³ Nenou Eye athai hinou khailupa peie. E sü athai maivei teidei hi hota laire tea tapare, ana nenou avei hrümai sü thoupu peie.

⁴ Mapao ye louche-a buyu mai hrülai, puhye lou sousho khaio. Mashee-o nou daidai soupei khaitoue touyu khesü licholoua puhye kalo paokhaio.

⁵ Puhvei lekha rarou hai phajütou baie, puhvei aveih nawo louzü akhai ha-e. Kheiki nghidzü koua buyuma thainesho shona louzü savayu ve-a bailai.

⁶ E kaozhou veia bubaie ae haibüa E lah ahi paoe, “E hraongu daokhai toulai more.”

⁷ Oh Mapaowo, nevei zhuvea leshi hinou Eye deichi ali büa southou khousho-a nou khaipeie. Ana ne zhu ahinou pfüku pfüvai tayu phaki Esü ngaopi-a baiwe.

⁸ Oh Mapaowo, Enou neye kra-a nou kuwe, ae nevei soukha apei nasü khowe:

⁹ E thaiyu sü neye donou dai-e veiyu buge? E khü hi loutayu hai neye donou dai-e veiyu bue? Thaiyu mai nou neye paosho lousüvu? Puletao nou nevei acheche nasü paoshapa peilou süwu?

¹⁰ Oh Mapaowo, Enou khoyu avei akho nasü keipeio, ae Eye zhuvea peio! Eye soukha peio, Mapao!

¹¹ Enou vea-a dopfüa buyu hinou nenou Eye vasho-a cho-a buyu hisü soudapa peie, nenou avei veahoyu nasü polai peiwua Eye panou savayu sü ngaoloue.

¹² Südonou E ngasoua bulai moe; Enou neye lou sousholai. Oh Mapaowo, ne hai avei Ramai-e, Enou neye teisa nou kalo pao-a bulai.