LOUTAO 28 - SHEEYU BAIBEL (BSI)

Soukha Khoyu vei Veachi

¹ Eye vupa apeio Mapaowo, Enou neye kuwe. Enou kra-a kuyu avei pai sü kei peio. Nenou avei akho nasü keipei more toulouzü E hai athai maivei teidei hisü hota laire.

² Enou kra-a ne hinou soukha khoyu phaki avei akho nasü keinou peio, Enou nevei sheeyu rathoki hilova abah lapoa khoyu phaki keinou peio.

³ Mai ashi maitao, vah ashi souyu maitao, ae chipao lako aveih nou pao-a buyuma le khevai hai ngaorayu phoutao-a buyu maitaoye koa Eye mah duka peiso.

⁴ Puletao nou soupfü khaitouyu vah thaifüa ae puletao nou vah ashi soukhai touyu thaifüa puletaoye tudee peio. Puletao nou soukhai touyu vah haso thaifüa puletao nou ngaozüa buyu nasü puletao hi soupeio.

⁵ Puletao hai Mapao nou soupei khaitouyu vah haso khesü popei moe, ae puhnou soupfüyu vah khesü ngaophou more, südonou puhnou puletaoye sü tudee peilai ae teisa nou puletaoye sü souha khaiwulai.

⁶ Mapao ye paosho khaio; Enou kra-a soukha peio tea khoyu nasü puhnou keinou peie.

⁷ Mapao hai avei pfüchi nasüe, ae avei rüe; Enou puhye louchewe. Puhnou Eye soukha peie, ae Eye sousava peie, Enou puhye sashoyu lou nou soushowe.

⁸ Mapao nou puhvei maitaoye vupa peie, puhnou dopa louyu veoye sü vupeie ae puhye khailupa peie.

⁹ Oh Mapaowo, nevei maitaoye khailupa peio, ae nevei maitaoye shiha peio. Puletao vei zhaokhowo nasü nenou soupeio, ae teisa nou puletaoye kiko peio.