LOUTAO 27 - SHEEYU BAIBEL (BSI)

Paoshoyu Veachi

¹ Mapao hai avei ava ae Eye khailupa apeio nasüe; Enou mailia ngaopi laimoe. Mapao nou Eye kaozhou ashi teitei hinou vupa peiwe, haliro Enou ngaopire sü ha-e.

² Mai ashi mainou apei hi reih souve Eye southalai touyu phaki, puletao hai phi süloua kaodu ta-a bailai.

³ Reihmai me dushoyu ali nou Eye sühao loua buyuma Enou puletaoye ngaopilai moe, Eye ngaobayu maitao nou duyuma, Enou Ramai ye sü louche-a bubailai.

⁴ Enou hali Mapao hinou khowe; Enou jüpa-a phouyu nasü haina baie: avei hrümai veishi nou Mapao vei ki hinou bua puhvei aveih aduso nasü licho-a ae Eye khosa-a laipeio tea puh hinou khoyu nasü baie.

⁵ Veahoyu phaki puhnou Eye kiko peilai, puhnou Eye puhvei Rathoki hinou poku povai peilai ae kushoyu chuhdu ali phi hinou Eye pokhaitou toupeilai.

⁶ Südonou Eye sühao poa buyu ngaoba maitao jünou Enou veiloulai. Asayu nou shura soua puhvei Rathoki hinou Enou puhye posheela peilai; Enou lou soulai, Enou Mapao ye paosholai.

⁷ Oh Mapaowo, Enou neye kuyu phaki keinou peio! Eye zhuvea peio ae Eye chila peio!

⁸ Nenou “Ahi velo, ae Eye tholo” tea paoyu phaki, Enou haibüa chila peie, “Mapao, Enou ne hi velai,

⁹ Ne ahinou tarei tavai peiso!” Eye rarou peiso; Ne kilai Eye huta peiso. Ne sü Eye soukha apeio nasüe; Eye thaowua tapeiso, Eye malai peiso, Oh Ramai, Eye khailupa apeio.

¹⁰ Apfü ae apuo nou Eye thaowua talou vei-e, ana Mapao nou Eye kiko peilai.

¹¹ Oh Mapaowo, nenou jüpayu ludu na hisü Eye panou taloure donou doupeio, ae zhoukao veiyu ludu hisü Eye süthaisa-a tapeio, daiolouzü Eye ngaobayu mai alao bue.

¹² Eye soushilai tea da-a buyu maitao, ae Eye soupi-a buyu ngaoba maitao hinou Eye thaokhai peiso.

¹³ Avei hrümai haina hinou Mapao vei aveih, ae aduso nasü ngao-a hrülou süe touyu Enou louchewe.

¹⁴ Mapao ye sü louchelo! Puhye lü louchelo, chathai taso. Mapao ye louchelo.