LOUTAO 26 - SHEEYU BAIBEL (BSI)

Mai Aveih Mainou Veachi Paoyu

¹ Oh Mapaowo, Eye mah lia ha-e tea paopeio, daiolouzü Enou kaozü vah khesü souwe, ae avei hrümai teitei nou neye louchewe.

² Mapaowo, Eye kabüa busa touyu sü zhukhaio, avei tsüle khesü ne lah kabüa bue touyu poa zhukhaio.

³ Daiolouzü nevei tobai soumoa leshi peiyu hisü nou Eye süthaisa-a tapeiwe, ae nevei acheche hisü Enou teisa nou tawe.

⁴ Enou muh hayu maiye koa bumoe, ae baonüa thephayu maiye salaiwu moe.

⁵ Enou vah ashi souyu maiye koa salaiyu sü ngaora-e, ae mai ashimai thaifüta moe.

⁶ Mapaowo, avei mah ha-e tea E abah dzüteiwe, ae nevei posheelabu pehao hinou tasühao-a neye thowe.

⁷ Enou neye paoshoyu lou sü souwe, ae nevei khupa shoyu vah haso khesü paowe.

⁸ Oh Mapaowo, nenou buyu buh, ae nevei kathe buyu buh nasü Enou leshi-e.

⁹ Eye mah souyu mai moa maiye dathayu maiye koa souha peiso.

¹⁰ Puletao hai teile busasü vah ashi soua baiwe, ae seihla polai tea bukoute-a baiwe.

¹¹ Ewo louzü, kaozü vah nasü souwe; Eye zhuvea peio ae khailupa peio.

¹² Kaozhou ashi daore teitei hinou E hai veia bubaie, maisou nou vejüa buyu nghoujü hinou Mapao ye sü Enou paosholai.