LOUTAO 22 - SHEEYU BAIBEL (BSI)

Dopfüa Krayu ae Lou Soushoyu

¹ Oh a Ramai, avei Ramai, ne daisounou Eye thaowure? Ne daisounou Eye soukha peire hinou ae Enou lüa nou rayu hisü nou dousho poa tage?

² Oh a Ramai, hea tei vayu phaki, Enou neye kra-a nou ku-e, ana nenou Eye chila pei more; ae khei-a neye ku-e, ana Eye panou soyu sü ngaolu moe.

³ Ana neye sü Sheeyu Nasüe tea vebuh peiwure, ae Israel mainou paosho-a buyu sü ne-e.

⁴ Etao vei puopaoh maitao nou neye sü louche-e, ae nenou puletaoye sü khailupa peie.

⁵ Puletao nou neye kuloue, ae puletao hai kaozhou ashi hisünou tarei paloue, puletao nou neye louche-e, ae puletaoye hraongu panou ngaomoe.

⁶ Ana Ewo louzü mai more; shikhaongao ali baie, mai hrülai nou Eye sü ngaora-e!

⁷ Eye ngaoyu mai hrülai nou Eye sü konüre, puletao vei mali sü thaipa loua ae puletao pei sü nguloua haibüa paoe,

⁸ “Nenou Mapao ye sü louchewe, puhnou neye daisounou khailupa peimowe? Mapao nou neye jüpayu thaisü, puhnou neye daisounou soukha peimowe?”

⁹ Nenou Eye apfüpou hinou sapa peie, ae E nahmaitou soua buki nenou Eye kiko papeie.

¹⁰ Nalouyu teithe hinou Enou Eye ne hi peiwure, ae apfü pou hinou buyu teile hinou ne hai avei Ramai.

¹¹ Ahinou dousho-a bupeiso, daiolouzü kaozhou ashi nasü ahi nghitei-a bure, ae mai linoua Eye soukha peire mai hare.

¹² Chode taoli nou sühao louyu büa Eye sü ngaoba maitao nou sühao loure, Bashan hi soushi shoyu chodetao nou sühao louyu büa Eye sü haoloure.

¹³ Houzüa nou rapoa laiyu khaosouveo büa puletao hai mü hepoa Eye dulai tea bure.

¹⁴ Deiphi hi dzü lalaiyu büa avei khouko sü hatare. Avei rao teitei sü kuku takhai toure, avei lüthou hai laivoudzü phe nou voudzü zhaotayu büa hatare.

¹⁵ Avei raoqulu hai naihü büa thetare, ae avei mali hai akhou hinou taotei touloure. Nenou Eye panou thaire donou naiphao hi khaipeiwure.

¹⁶ Sei nou sühao louyu büa maishi maime ali nou Eye sü sühao loure, puletao nou aphi bah sü pailoure.

¹⁷ Avei rao veishi pa zhingaore. Eye ngaobayu maitao nou Eye sü phetei touloure.

¹⁸ Puletao nou avei sabanü khesü poloua rako zhua zhiloure.

¹⁹ Oh Mapaowo, ahinou douta peiso! Thasho-a nou tave Eye vupa peio!

²⁰ Khoche mü hinou Eye vupa peio, seitao hinou avei hrirai khailupa peio.

²¹ Souveotao hinou Eye vupa peio, rekou nou buyu chodetao hinou Eye khailupa peio, Esü halia soulou hore.

²² Nenou soupeiyu vah haso khesü Enou avei maitao hi paopeilai; puletao nou vejüa buyu hisü Enou neye paosholai.

²³ “Mapao vei kilai maitaore, puhye paosholo! Jakob vei tyaosholea maitao, puhye tsükhoulo! Israel maitaore, puhye tholo!

²⁴ Puhnou touha soha laiyu maiye ngaonghi moe, moyuma puletao nou veahoyu nasü ngaophou moyu sou moe, ana puletao nou khoyu khesü kei-nou peiwe.”

²⁵ Nenou soupei khaitouyu vah khesü Enou maisou vejüa buyu hinou neye paosho peilai, neye tho-a buyu maitao nghoujü nou Enou neye peilai tea paokhai touyu posheela khesü posheela peilai.

²⁶ Touhayu maiye sü panou tounü sü touloulai, Mapao ye phouyu maitao nou neye sü paosholai. Puletao panou teisa nou savayu sü soulou theo.

²⁷ Tyahrü hrülai nou Mapao ye sü licholai. Deiphao kainghou veishi hinou hrüyu mai hrülai sü puh hi dakhai velai; tyahrü veishi nou puhye sü tholai.

²⁸ Daiolouzü Mapao nou veo nasü baie, ae puhnou tyahrü hrülaiye sü tukha-a hrülai.

²⁹ Khaophu souyu mai hrülai nou puhye sü khurülai, thai-a bailaiyu mai hrülai nou puhye sü nakou khurülai.

³⁰ Haithai nou hrüvere bonakha maitao-a puhvei kuvah sü soulai, vere khaphao teitei nou Mapao vei ko sü paolai.

³¹ Nakou moa buyu maitao hisü haibüa paolai, “Mapao nou puhvei maitaoye khailupa peie.”