LOUTAO 21 - SHEEYU BAIBEL (BSI)

Veilouyu donou Paoshoyu

¹ Oh Mapaowo, veo sü lesa shoa nou bue, daiolouzü nenou puhye sü khouko thoupeie, puhnou asawe, daiolouzü nenou puhye veilouyu sü peie.

² Puhnou jüpa-a buyu veishi sü nenou puhye peie, puhvei akho khesü nenou noupeie.

³ Nenou puhye shiha alao soumoa peie, ae puhye veikayu sana nou peirü sü rüpeie.

⁴ Puhnou ne hinou hrümai kho-e, ae nenou puhye hrüshoyu nasü peie.

⁵ Nenou puhye soukha peiyu donou puhvei kathe sü dushore, ae nenou puhye sü zhih tayu ae tsükhouyu hai-a peie.

⁶ Puh hisü teisa nou nevei shiha sü bupeie, ae nenou puhye salai peiyu donou puh hi asah nasü bue.

⁷ Khoukhoulai Mapao ye sü veo nou louchewe, ae Mapao vei tobai soumoa leshi peiyu donou puh hai teisa nou kaozhou veia hrüloulai.

⁸ Veo nou puhye ngaobayu mai hrülaiye sü nüloulai, puhye ngaorayu mai veishiye sü puhnou nüloulai.

⁹ Puhnou veyu phaki, puletaoye sü mei deiyu büa souha peilai. Mapao vei lekha rarou sünou puletaoye sü zhaoloulai, ae mei nou puletaoye sü deihawulai.

¹⁰ Puletao vei tyaosholea maitao hai mai ali koute-a shokhai peilai moe, veo nou puletao mai hrülaiye sü souha khaiwulai.

¹¹ Puletao nou puhye soushire donou tsüchoda-a shodo ashi khesü soulai, ana puletao hai veilou laimoe.

¹² Puhnou puletaoye voulouthou nou kalai, ae puletao hai ngaopi-a tuta bailai.

¹³ Mapaowo, Etao nou nevei khouko aduso nasü paoshowe! Nevei khouko sü Etao nou lou sousholai.