LOUTAO 20 - SHEEYU BAIBEL (BSI)

Veilouyu donou Veachi Paoyu

¹ Nenou veaho-a buyu phaki Mapao ye panou nevei veachi sü keinou peio! Jakob vei Ramai ye panou neye vupa peiyu sü soulou theo!

² Puhnou neye panou Rathoki hinou soukha peiyu sü seive peiyu soulo, ae Zion deichi hinou neye babou peiyu sü panou soulo!

³ Nenou posheela peiyu teitei sü puhye panou popeiyu sü soulou theo, ae nenou meideia sheelayu veishi sü puhye panou jüpayu sü soulou theo.

⁴ Nenou jüpa-a buyu teitei sü puhye panou neye peiyu sü soulo, ae nenou tsüchoda-a buyu veishi panou vete louyu sü soulou theo.

⁵ Süthaisü nenou veilouyu donou Etao hai lesa-a nou shusoua shalai, ae nenou ngalouyu donou Etao hai khonüh nüa Ramai ye paosholai.

⁶ Chuo Enou süloure, süolouzü Mapao nou dopa khaitouyu puhvei veoye sü veilouyu sü peiwure, puhnou sheeyu raki vanou puhnou veachi sü keinou peie, ae puhvei khouko sünou puhye veilouyu sü peiwure.

⁷ Kamai-a nou lah puletao reih vei rheiluki khesü louchewe ae kukhe mainou puletao vei rhei khesü louchewe. Ana Etao louzü Etao Ramai Mapao vei khouko nasü louchea baie.

⁸ Sübüyu maikhe mai sü kaodu ta-a bailai, ana Etao louzü kushu loulai ae lachü loulai.

⁹ Oh Mapaowo, veo ye veilouyu nasü peio, Etao nou kuyu phaki Etaoye chila peio.