LOUTAO 19 - SHEEYU BAIBEL (BSI)

Teideiphao Souyu hi Ramai vei Kathe

¹ Ratei nou Ramai vei kathe sü pongaowe! Raki hi buyu teivu khenou puhvei basha khesü ngaowe.

² Zhou teitheh payu nasü nou thainesho-a teithehpa-a bailai touyu sü paosü peiwe, ae khei teimai teizhiyu haina nou dosho-a khei sü velai touyu hai paosü peiwe.

³ Paila moyuma chipao lako aliro paomoe, hakho ali-a choumoe;

⁴ ana puletao vei chipao hai deiphao teitei seita loua baiwe, ae deiphao kainghou adai veishi hi chouve khailou baiwe. Ramai nou ratei hinou teinghiye donou ki ali soupei khaitoue.

⁵ Sübüa puhnou shinghi laiyu mai ali büa shona hai tapawe, ae tuvayu mai ali nou tuvei shopoa tuyu büa pawe.

⁶ Puhnou ratei alilo vanou paloua tasühao poa alilo vahi kou loutawe. Hataralia puhvei souyu na hisü nou tutsü louhoe.

Mapao vei Chikha

⁷ Mapao vei chikha hai chekho baie, haina nou rakoye sü souchü soukhou peie. Mapao vei kharochi hai louche louveie, haina nou tsüdo hayu maiye sü tsüdo aveih peiwe.

⁸ Mapao vei chikhatao hai kao-e ae sütao zü louyu mai hai savawe. Mapao vei kharochitao hai cheche-e, ae sütao nou maikhe maiye sükulou süyu tsüdo aveih nasü peiwe.

⁹ Mapao ye tsükhoulo, puh hai veisho-e; puh hai akhai ha-a nou sübüa bukoute-a bailai. Mapao nou chiku peiyu hai kao-a baiwe, puhnou chiku peiyu hai teisa nou cheche hisünou kupeia baiwe.

¹⁰ Sütao hai sana jünou jüpapulo, sütao hai laivoudzü veikayu tyajünou jüpu hie.

¹¹ Sütao nou nevei kilai Eye tsüdo peiwe, sütao zü louyu donou Eye buu peie.

¹² Mai ali-a lah vei mah nasü ngaolou moe; Oh Mapaowo, Eye ngaomoyu mahmotao hinou khailupa peio.

¹³ Pfüphao nou sounüa souyu mahtao hinou-a Eye povai porei peio, sütaoye panou Eye khasa-a bupeiso. Sükulouzü E hai lichekho-a bailai, ae mahmo ashi hinou E hai shee-a bailai.

¹⁴ Avei chipao lako ae Enou tsücho-a buyu khesü nenou popeio, Oh Mapaowo, avei baibu ae Eye khailupa apeio.