LOUTAO 16 - SHEEYU BAIBEL (BSI)

Lülouche-a Paoyu Veachi

¹ Eye vupeio, Oh Ramai; daiolouzü ne hinou tave baichao loulai.

² Enou Mapao hi paoe, “Ne hai avei Mapao-e; ne hinou moa ahi havei touyu ali-a hae.”

³ Mapao vei chilee checheyu maitao hai daizhou koute veisa! Enou sava kayu hai puletaoye koa buyu nasüe.

⁴ Rashitaoye thaihu tayu maitao hai lah puletao hi veahoyu povepu loua baie. Puletao nou posheela pei-a buyu hisü Enou louzho laimoe; Enou puletao vei rataoye sü tholai moe.

⁵ Oh Mapaowo, Enou neye likhei avei soua bua bailai, ae nenou Eye jüpayu na teitei sü peie; avei hümamai hai ne bah hinou bue.

⁶ Nenou Eye sapeina peikhai touyu khesü daizhou koute ngaokhupa-e; sütao hai daizhou koute veisa!

⁷ Enou Mapao ye sü paoshowe, daiolouzü puhnou Eye süthaisa-a tapeie, ae khei teile hia avei tsüle sünou Eye paodou peie.

⁸ Mapao nou Eye koa bukoute peiwe touyu Enou süe, puh hai ahi nghitei-a bue, südonou Eye hatara linou soulülou hoe.

⁹ Südonou Enou asa-a puhye kalo paowe, ae pei hiyu lia ha-a nou vaphi tea bue,

¹⁰ daiolouzü puhnou Eye athai vei khouko hinou vupa peie. Enou chilee cheche-a puhvei kuvah sü soupeie, ae puhnou Eye thaimai vei teidei hisü panou hotalai moe.

¹¹ Nenou Eye hriyu ludu nasü ngaopeilai; nenou Eye koa bupeiyu donou ahi hai savayu phoutao-a bue, ae teisa nou Eye savayu nasü pove peie.