LOUTAO 148 - SHEEYU BAIBEL (BSI)

Deiphaomai Hrülai Ramai ye Paosholo tea Kuyu

¹ Mapao ye paosholo! Raki vanou Mapao ye paosholo, kuyu buh hinou hrüa buyutao puhye paosholo.

² Rakivamai hrülai, puhye paosholo, puhvei reihmai hrülai, puhye paosholo.

³ Khouh teinghei, puhye paosholo; puhye paosholo, tei hinou va-a buyu vuhtao.

⁴ Kukayu hi buyu rateitao, puhye paosholo, ratei pei hinou buyu dzütao, puhye paosholo.

⁵ Puletao hrülaiye sü panou Mapao vei zhih sü paosho khaio! Puhnou kharochi peikhaie, sütao hai souloua baie;

⁶ puhvei kharochi thaifüa puletao hai lahkuku nou bure buh hisü teisa nou buloue, ae puletao nou puhvei chi sü züba moe.

⁷ Deiphao sü panou Mapao ye paosholo, dzü hi buyu maitouyu khaotao ae zaidu hi buyu hrülai,

⁸ tei peivavayu na ae reithoutao, vüra ae teihaotao, ae teikhai chishoyu khesü puhvei kharochi sü züe.

⁹ Puhye paosholo, deichi ae deitaoh veishi, rashibetao ae vaobvütao;

¹⁰ kikhaorü ae rekounou buyu hrikhaona hrülai, pounou roupoa tayu khaonatao ae tei hi raohou veishi, puhye paosholo.

¹¹ Puhye paosholo, veo maitao ae mai hrülai, veo nahpoututao ae süthai-apei mai hrülai;

¹² kheloumai, nahle maitao, tsümaitao ae nahmaitou hrülai nou puhye paosholo.

¹³ Puletao mai hrülaiye panou Mapao vei zhih sü paosho khaio! Hakukhe veishi jünou puhvei zhih hai dupu hie, puhvei kathe hai deiphao ae raki jünou kupu hie.

¹⁴ Puhnou puhvei maitaoye soukhouchi peie, südonou puhvei mai hrülai, puhye paosholo. Israel maitao hai puhnou leshi shoe. Mapao ye paosholo!