LOUTAO 147 - SHEEYU BAIBEL (BSI)

Khoukhoulai Ramai ye Paoshoyu

¹ Mapao ye paosholo! Etao Ramai ye lou soushoyu hai veisho-e; puhye paoshoyu hai vashoe, südonou puhye paosho züe.

² Mapao nou Jerusalem sü soushupu peie, ae puhnou vakou nüpoa tayu maitaoye sa-a dakhai vepeie.

³ Puhnou tsüle pepoa buyu maitaoye sü souvei peie, ae zhizhu khaitoua buyu maitaoye sü kiko peie.

⁴ Puhnou teihi vuh khesü panou haizhou bulai touyu sü soupeie, ae alili nou zhih kupeie.

⁵ Dushoyu ae khouko bushoyu hai Etao Mapao-e, puhvei tsüsü hai Etao nou süvete louhoe.

⁶ Puhnou tainou soua laiyu maiye souduso peie, ana mai ashi maiye deiphi hi sounakou khai peie.

⁷ Mapao ye lou nou sousho khaio; Etao Ramai ye poa lou souyu baseina noupu paila aveih nou sousho peikhaio.

⁸ Puhnou ratei hi teihao khesü poa khaipeie; puhnou deiphao hi teirü kou peie ae poudai khesü puhnou deichi hinou pa paopa peie.

⁹ Puhnou hrikhaona khesü touso peie, ae ra-a buyu tei hi lüche tao-a touso peie.

¹⁰ Puhnou asayu hai khoushoyu rheitao donou moe, moa khuvei shoyu reihmaitao donou moe;

¹¹ ana puhnou savayu hai puhye tsükhoua buyu maitaoye donoue, ae puhvei tobai soumoa leshiyu nahai louche-a buyu maitaoye donoue.

¹² Oh Jerusalem, Mapao ye paosholo! Oh Zion, Ramai ye paosholo!

¹³ Puhnou nevei rokhubomü khesü soukhou peilai; puhnou nevei maitaoye sü ha peilai.

¹⁴ Puhnou nevei deirai hisü kaonayu hai peilai, ae puhnou neye sü thoudzü veishoa nou peilai.

¹⁵ Puhnou deiphao hisü kharochi peie, ae puhnou paoyu nasü thashoa nou soupeie.

¹⁶ Puhnou vü nou sahba ali büa khukhai peie, ae vüra khesü naihü büa soupho rarou peie.

¹⁷ Puhnou reithou hai chuh ali büa seikou peie, puhnou kaosho-a nou seive peiyu sütao hisü mai lia lalou hoe!

¹⁸ Süthaisü puhnou kharaochi peikhai-e, vüke khesü dzü vita-a baiwe; puhnou teikhai seive peikhai-e, dzü hai küta-a baiwe.

¹⁹ Puhnou chipao hai puhvei maitao hi peie, puhvei paodou peitao ae chikhatao hai Israel mai hi peie.

²⁰ Puhnou haibüyu hai tyahrü kukhe hi soupei moe; puletao hai puhvei chikha khesü sümoe. Mapao ye paosholo!