LOUTAO 146 - SHEEYU BAIBEL (BSI)

Khailupa peiyu Ramai ye Paosholo

¹ Mapao ye paosholo! Arako, Mapao ye paosholo!

² E hria buki sasü puhye paosholai, avei hrümamai veishi sünou E avei Ramai ye lou sousholai.

³ Süthai-apei maitaoye loucheso; deiphao mai nou neye khailupa peilou hoe.

⁴ Puletao nou thaitayu phaki, nai vita-a bailai; süzhou teithe hinou puletao vei tsü chodayu veishi hai akhai soua baie.

⁵ Asayu maitao hai puletaoye panou Jakob vei Ramai nou soukha peiyu ae puletao vei Ramai Mapao hinou vureih-a buyu maitao-e.

⁶ Puhnou raki, deiphao ae zai, alia sütao hinou buyu na veishi sü soupeie. Puhnou apaokhai touyu khesü puhnou teisa nou khaipeie;

⁷ puhnou veahoa laiyu maiye sü kaozü hinou chiku peie, ae houzüa laiyu maiye pouphou reikha soupeie. Mapao nou hukhaki hi buyu maiye lahdo soupeie,

⁸ ae nghicha laimaiye souvei peie. Puhnou kaodua buyu maitaoye pola peie; checheyu maiye puhnou leshi peie.

⁹ Puhnou Etao vei teidei hinou buyu shetumaiye vupa peie; puhnou mimea maipfü ae rounahtou taoye soukha peie, ana mai ashi maiye souha peie.

¹⁰ Mapao nou teisa sü veo soulai. Oh Zion, nevei Ramai nou akhai ha-a teisa nou veo sü soulai. Mapao ye paosholo.