LOUTAO 145 - SHEEYU BAIBEL (BSI)

Paoshoyu Lou

¹ Oh avei Ramai ae veo, Enou nevei duso nasü paosholai. Enou neye teisa nou kalo paolai.

² Teithechü Enou neye kalo paopeilai, Enou neye teisa nou paosholai,

³ Mapao hai dushoe ae puhye soutaosoua paosho züe, puhvei aduso nasü Etao nou süvete louhoe.

⁴ Nenou soukhai touyu vah haso khesü khaphao ali hinou khaphao ali hi paosho poa koulai; puletao nou nevei khupayu vah khesü shapaolai.

⁵ Puletao nou nevei kathe ae khouko sü paolai, ae Enou nevei khupayu vah haso khesü licho-a bulai.

⁶ Maikhe mainou nevei khupayu vah haso khesü paolai, ae Enou nevei aduso nasü shapao peilai.

⁷ Puletao nou nevei aveih teitei sü paolai ae nevei zhuvea leshiyu nasü lou nou sousholai.

⁸ Mapao hai zhuvea leshi sühsho-e, lekha haha moe ae tobai soumoa leshi peiyu nasü phoutao-a bua baiwe.

⁹ Puh hai mai hrülai hi veishoa baiwe, ae puhnou soupeikhai touyu na veishi hi zhuvea leshi peiyu nasü bue.

¹⁰ Oh Mapaowo, nenou soupeikhai touyu bashana teitei nou neye sü paosholai, ae nevei maitao nou neye kalo paolai.

¹¹ Puletao nou nevei vedei vei kathe nasü paolai, ae nevei khouko sü mai hi paongaolai,

¹² sübüa mai hrülai nou nevei vah haso khesü süloulai, ae nevei vedei vei kathe nasü süloulai.

¹³ Nevei vedei hai teisa vei vedei soulai, ae nenou akhai ha-a teisa nou veo sü soulai. Mapao nou paokhai touyu chipao teitei hai cheche-a vete-a bailai, ae puhnou soupfüyu veishi hai zhuvea leshi hinou soupeia baie.

¹⁴ Veaho-a laiyu maiye puhnou soukha peie, kaodu tayu maiye sü puhnou phaola phaoshu peie.

¹⁵ Hriyu na hrülai vei areih nasü ne baie, ae nenou puletaoye sü touso hai peie.

¹⁶ Nenou puletaoye sü rukhalou sü peie ae puletao nou jüpayu veishi sü peie.

¹⁷ Mapao nou souyu vah teitei hai kaozü hinou soupeia baie, ae puhnou leshi hinou vah haso veishi hai soupeie.

¹⁸ Puhye kua buyu maitao hisü puhnou nghiteia bupeie, puhye cheche-a nou phouyu mai hisü nghiteia bupeie.

¹⁹ Puhye tsükhoua buyu maitaoye sü puhnou puletao vei jüpa na khesü peie; puletao nou krayu paisü puhnou chouloua puletaoye khailupa peie.

²⁰ Puhye leshi-a buyu mai hrülaiye sü puhnou kho peie, ana puhnou mai ashi maiye sü souha-a bailai.

²¹ Enou Mapao ye sü teisa nou paosholai, puhvei sheeyu zhih nasü panou hrikhaona hrülaiye paosholo.