LOUTAO 141 - SHEEYU BAIBEL (BSI)

Koukhe Veachi Paoyu

¹ Oh Mapaowo, Enou neye kua bue, chunou Eye soukha peio! Enou neye kuyu phaki avei pai sü keipeio.

² Enou veachi paoyu sü poukai nüvei meideiyu ali büa popeio, ae abah lashuyu haina hai koukhe posheela peiyu büa popeio.

³ Oh Mapaowo, amü panou khore donou reikhaomai ali khaipeio, avei mütaiye panou khore donou mai ali khaipeio.

⁴ Eye panou vah ashi souyu hi louso, ae mai ashi maiye koa kaomoyu vah khesü souso. Eye panou puletao vei savayu khonüh hi louzhoso.

⁵ Mai aveih maiye panou Eye zhuveayu hinou tudee-a züpeiyu sü soupeio, ana mai ashi mainou Eye tsükhou peiyu nasü enou jüpa moe, daiolouzü Enou teisa puletao vei vah ashi souyu khesü aetou moa veachi paoe.

⁶ Puletao pei hinou khasa-a hrüyu maitaoye chulya shiyu pei hinou laikou peiyu phaki, maikhe mainou avei chipao khesü cheche-e tea nou süloulai.

⁷ Süü ali hai jüde loua rakho sasayu bütoua puletao vei rao khesü khüpe hinou soupho raroua khaipeilai.

⁸ Ana khoukhoulai avei Mapaowo, Enou neye louche-a bue. Nevei vupa peiyu nasü Enou phoua nou bue, Eye panou thaiso!

⁹ Puletao nou Eye muloulai tea rüh southou khaitouyu hinou povai peio, ae mai ashi maitao nou rüh southou khaitouyu hinou vupa peio.

¹⁰ Enou puletao vei shorüh hinou tavai tarei palouyu phaki, puletaoye sü panou lah puletao nou southou khaitouyu rüh hinou mulouyu sü soupeio.