LOUTAO 140 - SHEEYU BAIBEL (BSI)

Vupa Peire donou Veachi Paoyu

¹ Oh Mapaowo, Eye mai ashi maitao hinou khailupa peio, Eye zhaipou shiyu maitao hinou vupa peio.

² Puletao hai teisa nou shodo ashi soua bu baie, ae züveire donou souda-a bukoute-a baiwe.

³ Puletao vei mali hai nghou tushitya raibüe, ae puletao vei chipao hai tushi shoyu nghouvu raibüe.

⁴ Oh Mapaowo, mai ashi maitao bah hinou Eye vupa peio, zhaipou shishoa Eye soushilai tea buyu maitao hinou Eye kiko peio.

⁵ Khaophu souyu maitao nou Eye muloulai tea rüh southou khaipeiwe, ae Eye beloulai tea puletao nou khahbe sü avei ludu hi khikhai toue.

⁶ Enou Mapao hi paoe, “Ne hai avei Ramai-e.” Enou kra-a soukha khoyu avei pai keipeio, Mapao.

⁷ Oh Mapaowo, Khoukhoulai avei Mapao, Eye vupa-apeio, nenou Eye reih souyu reihbu hinou vupa peie.

⁸ Mapao, mai ashi maitao nou jüpa-a buyu khesü panou ngaolouso, puletao nou shodo ashi souyu khesü panou vete louso.

⁹ Eye ngaobayu maitaoye panou veilouso; puletao nou Eye soupi-a buyu khesü panou puletao hi dakhai koupeio.

¹⁰ Soushoyu meithou nou puletao hi lakou peio; puletaoye sü deibvü hi panou delou loua dakhai papuso.

¹¹ Dahrührüa maiye poshiyu maiye sü panou veilouyu ngaoso; zhaipou shiyu maiye sü panou ashi hinou veiloua puletaoye sü souha peio.

¹² Oh Mapaowo, nenou touha laiyu maiye vupeiwe, ae veahoa laiyu maivei zü nasü zhu peiwe touyu Enou süe.

¹³ Checheyu maitao nou neye sü paosholai, ae puletao nou nevei nghoujü hinou bulai.