LOUTAO 139 - SHEEYU BAIBEL (BSI)

Süchekhoyu Ramai

¹ Oh Mapaowo, nenou Eye phou-e ae Eye süloure.

² Enou souyu vah veishi nenou sükhaiwe; doushoa buyuma nenou avei tsüle teitei sü sükhaiwe.

³ Enou vah soua buho moa ngasoua busa nenou ngaowe; avei vah haso veishi sü nenou süwe.

⁴ Enou paipa mojünou, dai chi paopa laisa touyu nasü nenou süwe.

⁵ Nenou avei pehao teitei hi dai bue touyu sü süwe; nenou nevei khouko sünou Eye vupa peie.

⁶ Nenou süngaoyu hai Eye donou khupa zhuhle-e; Enou haisü ha kilia süvete louhoe.

⁷ Ne hinou tuvai paloua E taho buloure buh daiki nou bue? Ne nghoujü hinou tutsü loure buh daikiniou bue?

⁸ Enou raki hi kheyuma, ne sü sühinou bua bailai, Enou athai maivei teidei hi hoyuma sühia ne sü bua bailai.

⁹ Enou teinghei palova zhaola poho buyuma moa teinghei loulova jünou dou-a buyuma,

¹⁰ buh sühia nenou Eye salai peilai, ae buh sühia nenou Eye soukha peilai.

¹¹ Teizhiyu nasü panou Eye züholo, moa apehao hi buyu ava nasü panou teimaiyu khei soupeio tea pao-a buyuma,

¹² azhi na koute-a ne hio zhi moe, ae kheiki-a ne hiolouzü hea teivayu bütoua baie. Ne hiolouzü teizhiyu ae teivayu hai raibütoua bubaie.

¹³ Nenou avei vasou veishi sü soupeie, nenou Eye apfü pou hinou sou peie.

¹⁴ Neye sü ngaopiyu kao-e, südonou Enou neye paoshowe; nenou soupfüyu vah haso teitei hai ngaokhupa khaibaie. Sütao teitei hai Enou sükhai toue.

¹⁵ Nenou soutaosoua avei rao khesü apfü vei pou khevai hinou southou tou peie. Enou sühinou kheikhei soua duso payu phaki, ae sühinou bue touyu sü nenou süe—

¹⁶ E nakoumo jünou nenou Eye ngaore. Eye panou teile kasho hrülai touyu khesü Eye souchemo jünou nevei larübvü hisü rüthou khaiwure.

¹⁷ Oh Ramai, nenou tsüchoyu khesü Eye donou daizhou koute tatei sarou! Sütao hai daizhou koute pou-a nou busa!

¹⁸ Enou sütao hai phoulai toulouzü, sütao hai rei hi vonai jünou pou-a bulai. Enou kaishuyu phaki, Esü neye koa bue.

¹⁹ Oh Ramai, nenou mai ashi maiye southa peiyu Enou jüpashoa nou bue! Zhaipou shishoa buyu maitao nou Eye thao-a tare nasü E vuzhi shoa nou bue!

²⁰ Puletao nou neye sü ngaophou moa chi ashi nou pao nou bue; puletao nou nevei zhih sü paoshia nou bue.

²¹ Oh Mapaowo, neye ngaorayu maitao hai E-a puletaoye ngaora-e! Neye khaitya duyu maitao hai Enou puletaoye ngaonü moe!

²² Enou puletaoye sü cheche vuzünou ngaora shore, Enou puletaoye sü Eye ngaobayu maitao-e tea powe.

²³ Oh Ramai, Eye soutaosoua nou poa zhupeio, ae avei tsüle sü süpeio; Eye kabü laisa tea zhupeio, ae Enou tsüchoyu veishi sü süpeio.

²⁴ Ahi hakinou tsü ashi bulouzü popa peio, ae Eye teisa nou bure ludu hisü süthaisa-a tapeio.