LOUTAO 138 - SHEEYU BAIBEL (BSI)

Kalo Paoyu Veachi

¹ Oh Mapaowo, avei tsüle veishi nou peia Enou ne kalo hai paowe; ratao nghoujü hinou Enou neye lou soushouwe.

² Enou nevei Rathoki hilo reiloua nakou neye thowe, ae nevei zhih sü paoshowe, daiolouzü nevei tobai soumoa zhuvea leshi peiyu donou ae nevei chilee checheyu donou alia nevei zhih ae nevei chikhatao hai hateitei jünou kuka-a soungao peiyu donou.

³ Enou neye kuyu phaki nenou Eye chila peie, Nevei khouchi sünou Eye soukhou peie.

⁴ Oh Mapaowo, deiphao hi vemai hrülai nou neye paosholai, daiolouzü nenou apaokhai touyu khesü puletao nou choure.

⁵ Nenou soupeikhai touyu vah hasotao ae nevei aduso khesü puletao nou lou soushowe.

⁶ Ne hai kushoa nou buyuma tainou tisoua laiyu maitaoye sü kiko peie, ae khaophou soua laiyu maitao hai ne hinou tutsü louhoe.

⁷ Eye veahoyu ae tateiyu khenou süho-a buyuma nenou Eye kikoa sa-a tapeie. Eye ngaobayu maitaoye sü nenou dupeie, alia nevei khouko sünou Eye khailupa peie.

⁸ Nenou paohkhai touyu teitei sü nenou souvete peilai; Mapao, nevei leshiyu hai akhai hae. Nenou soushu khaitouyu vah khesü souche peio.