LOUTAO 135 - SHEEYU BAIBEL (BSI)

Paoshoyu Lou

¹ Mapao paosholo! Mapao vei kilai maitao, puh zhih sü paosholo,

² Mapao vei ki hinou kuvah soua buyu maitao, Etao Ramai vei Rathoki hinou vah soua buyu maitao, puhye paosholo.

³ Mapao ye paosholo, daiolouzü puh hai vei-e, puhvei zhih sü lou sousho khaio, daiolouzü puh hai maiye zhuvea sühshoe.

⁴ Puhnou Jakob ye sü puhvei soure donou doloue, Israel maiye puhvei mai soure donou doloue.

⁵ Etao Mapao hai dusho-e touyu Enou süwe, puh hai ramai hrülai jünou dupu hie.

⁶ Puhnou rakiva hi ae deiphao hi, zaidu hi-a ae deikhevai hia sounü vah veishi sü souloua baiwe.

⁷ Puhnou deiphao akhai hinou teihao seive peie, puhnou teirü peire donou pa teisüve peie, ae puhvei na khaiyu kide hinou teikhai sü pove peiwe.

⁸ Puhnou Ejipt teidei hi nah nakou raikayu mai hrülai ae kikhaorüa toukou raikayu hrülai sü southa khaitou peie.

⁹ Puhnou Ejipt hi khupayu vah hasotao ae shee khesü veo Pharaoh alia puhvei maitaoye tudee-a souvea peire donou soupeie.

¹⁰ Puhnou tyahrü taoli hai souha peie ae khouko püshoyu veo mai taoli hai southa peie.

¹¹ Amor maivei veo Sihon, Bashan maivei veo Og, alia Kanaan teidei hi buyu veo mai hrülai hai southa peie.

¹² Puhnou puletao vei teidei khesü puhvei maitao hi peie; puhnou sütao hai Israel mai hi peie.

¹³ Oh Mapaowo, neye sü teisa nou Ramai-e tea shapaolai; vere khaphao veishi nou neye sü louchelai.

¹⁴ Mapao nou puhvei maitaoye vupa peilai; puhnou puhvei kilai maitaoye zhuvea peilai.

¹⁵ Tyahrü kukhe maitao vei ramai hai shahu ae sana nou soua baie; puletao hai deiphao mai bah nou soua baie.

¹⁶ Puletao hai mü bue, ana raolou hoe; ae nghithou bue, ana ngaocha moe.

¹⁷ Puletao hai noubei bue, anou chou moe; puletao hai ssüa hailou hoe.

¹⁸ Puletaoye souyu maitao ae puletaoye loucheyu mai hrülaiye sü panou puletao nou soukhai touyu basharatao raibüa buyu sü soupeio!

¹⁹ Mapao ye paosholo, Israel maitao; Ramai vei napao maitao, puhye paosholo!

²⁰ Mapao ye paosholo, Levi maitaore; puhye tho-a buyu mai hrülai, puhye paosholo!

²¹ Zion hinou, Jerusalem hinou ae puhvei ki hinou Mapao ye paosholo! Mapao ye paosholo!