LOUTAO 132 - SHEEYU BAIBEL (BSI)

Rathoki Naye Paoshoyu

¹ Oh Mapaowo, David ye sü ngaipeiso, ae puhnou veaho shoa nou soukhai touyu khesü licho peio.

² Mapao, puhnou ne hi apaokhai touyu ae khoukhoulai Jakob vei Ramai hi chaachou soukhai touyu khesü licho peio.

³ “Enou ki hi velai moe, moa züphao hi taopalai moe;

⁴ E solai moe, moa zhilai moe,

⁵ Enou Mapao ye donou buh souda peimo koute, Khoukhoulai Jakob vei Ramai ye donou ki ali soupeimo koute hai.”

⁶ Etao nou Vo Sübvü vei ko khesü Bethlehem hinou chou-e, ae Etao nou sünasü Jearim vei dou hinou ngaoloue.

⁷ Etao nou paoe, “Etao Mapao vei ki hi velai khe, puhvei vebuh nghoujü nou Etao tave puhye tho laikhe.”

⁸ Oh Mapaowo, nevei khouko buyu vei shee soua buyu Vo Sübvü noupu Rathoki hisü tave loupeio, ae hai hinou teisa bupeio.

⁹ Nevei napao maitaoye panou kaozü nasü teisa nou soulo; nevei maitaoye panou sasho-a shusoua shalo.

¹⁰ Oh Mapaowo, nenou nevei kilai David hi apaopei khaitoue; nenou dolouyu veoye sü malai peiso.

¹¹ Nenou podakhailai moyu chaachou sü David hi haibüa soupei khaitoue: “Enou nevei nahpoutu mai aliye panou ne thaosü vekoulai, ae puhnou ne thai hai veo soua panou khasa-a bulai.

¹² Nevei nahpoutu maitao nou avei vo nasü pfüthomo louzü ae Enou peikhai touyu avei chikhatao hai züa bulouzü, puletao vei nahpoutu maitao nou teisa sü veo soua bukoute-a bailai.”

¹³ Mapao nou Zion sü doloure; puhnou sühinou puh ki sü sounüe.

¹⁴ “Enou buh hai hinou teisa sü bulai, hai hinou khasa-a buyu Enou jüpa-e.

¹⁵ Enou Zion hisü molou shiyu veishi hai peilai; puhvei touha laiyu maiye Enou touso peilai.

¹⁶ Puhvei napao maitao nou soupfüyu vah veishi sü Enou shiha peilai, ae puhvei maitao nou vasa-a nou shusoua lou soulai.

¹⁷ Sühi sünou Enou David vei nahpoutu mai aliye panou dushoyu veo soulai, Enou dolouyu veoye sü Enou koa bupeilai.

¹⁸ Enou puhye ngaobayu maitaoye hraongu soupeilai, ana puhvei vedei hai panou sava-a duso palai.”