LOUTAO 130 - SHEEYU BAIBEL (BSI)

Soukha Khoyu Veachi

¹ Oh Mapaowo, E veasho-a buyu hinou neye kua bue.

² Avei pai sü kei peio, Oh Mapao; Enou soukha peio tea paoyu avei pai sü keipeio.

³ Etao vei mahmo khesü nenou licho-a buyu thaio, thaonou ne nghoujü hinou lalou khailaige?

⁴ Ana nenou etao vei mahmo khesü khaipeie, südonou etao nou neye khuhao-a nou ne nghoujü nou la-a bue.

⁵ Enou Mapao vei soukha nasü vuzhi sho-a nou bue, ae puhvei chipao khesü enou louche-e.

⁶ Reikhaoyu maitao nou tei thepayu nasü kho-a buyu jünou la-a ae puletao nou tei thepayu nasü vureih-a buyu jünou la-a nou Enou Mapao ye vureih-a nou bue.

⁷ Israel maitao, Mapao ye louchelo, daiolouzü puhvei leshi hai akhai ha-e ae puh hai teisa nou khailu peinüshoa bua baie.

⁸ Puhnou puhvei maitao, Israel maitao vei mahmo teitei nou khailu peilai.